KAZ Minerals mamandary Pavlodardaǵy kolledj stýdentterine sheberlik tálimin ótkizdi
PAVLODAR. KAZINFORM – Qazaqstandaǵy mys óndiretin iri kompanııalardyń biri KAZ Minerals Bozshakol qyzmetkerleri Pavlodar hımııa-mehanıkalyq kolledjiniń stýdentterine qonaq lektsııasyn oqydy. Mamandar qurǵaq teorııanyń ornyna ózderiniń kásibı tájirıbelerimen bólisip, stýdentterge hımııalyq saraptaý laborantynyń jumysy, zamanaýı qurylǵylarymen jumys jáne naqty óndiriske qajet biliktilik týraly aıtyp berdi, dep habarlaıdy Kazinform agenttiginiń tilshisi.
Dáriske júzge jýyq stýdent qatysty. Іs-shara KAZ Minerals kompanııasy men Pavlodar hımııa-mehanıkalyq kolledjiniń arasynda 2023 jyly bekitilgen memorandým aıasynda ótti.
— Bizde alty mamandyq boıynsha 800 adam oqıdy. Biraq bıýdjetimiz shekteýli, sol sebepti bizge áleýmettik seriktester, atap aıtqanda — KAZ Minerals Bozshakol kómektesedi, — deıdi PHMK jetekshisi Iran Bektemirov.
Stýdenttermen kezdesýde KAZ Minerals Bozshakol ınjener-laboranty Rústem Sadyqov kenish pen zerthana jumysy týraly áńgimelep berse, basqarý isi boıynsha nusqaýshy Saltanat Muqysheva ustazdar úshin sheberlik tálimin ótkizdi.
— Bizdiń basty ónim — mys kontsentraty, sonymen qatar kúmis, altyn jáne basqa da qospalardy anyqtaımyz. Biz barlyq óndiris kezeńin qatań qadaǵalaımyz jáne jumysta kóbikti flotatsııany qoldanamyz, — dep atap ótti Rústem Sadyqov.
Qonaq lektsııalar Pavlodar oblysyndaǵy bilim berý isin damytýǵa salynǵan ınvestıtsııanyń shaǵyn bóligi ǵana. Kompanııa kóptegen baǵdarlamalardy júzege asyrýda. Solardyń biri — oqý granttarynyń bólinýi. Sońǵy alty jylda KAZ Minerals Bozshakol Toraıǵyrov ýnıversıteti men Pavlodar hımııa-mehanıkalyq kolledjiniń stýdentterine 10 mamandyq úshin 20-dan asa grant bóldi. Granttyń jalpy somasy 27,9 mıllıon teńge.
— Lektsııa qyzyqty, ári paıdaly boldy. Sonyń ishinde, jumys jaǵdaı týraly aqparatty atap ótkim keledi, — deıdi ekinshi kýrs stýdenti Samal Temirova.
Samal KAZ Minerals bólgen bilim grantyn alǵandardyń biri. Onyń kelesi qadamy kompanııa zerthanasynda aqyly jumys tájirıbesinen ótý bolmaq.
6 jyl ishinde «Taǵylymdama» baǵdarlamasyna Pavlodar oblysyndaǵy joǵary jáne orta bilim beretin oqý oryndarynyń 211 stýdenti men túlegi qatysty. Solardyń ishinde 120 jas KAZ Minerals Bozshakol kompanııasyna jumysqa turdy.
— Áleýmettik seriktestiktiń arqasynda biz damyp, jańa mamandyqtardy ashýdamyz. Kelesi jyly óńirde birinshi bolyp «Paıdaly qazbalardy baıytý» mamandyǵyna úmitkerlerdi ala bastaımyz, — deıdi Iran Bektemirov.
KAZ Minerals Toby «Sýper-kolledj» baǵdarlamasy boıynsha Pavlodar oblysyndaǵy joǵary jáne orta bilim beretin oqý oryndarynda oqý bólmeleri men zerthanalardy jasaqtaý isin qarjylandyrdy. Investıtsııanyń jalpy kólemi — 500 mıllıon teńge.