KAZ Minerals kompanııasynyń Aqtoǵaı ken orny 1,5 mıllıon tonna mys óndirý mejesine jetti
ASTANA. KAZINFORM — KAZ Minerals kompanııasynyń Aqtoǵaı kásiporny óz jumysyn bastaǵan ýaqyttan beri sýlfıdti kennen mys óndirýde 1,5 mıllıon tonnalyq mejege jetti, dep habarlaıdy Kazinform agenttiniń tilshisi.
Atalǵan kórsetkish óndiristik keshendegi eki ken baıytý fabrıkasy atqarǵan jumystyń nátıjesi. Jalpy ónimniń 1 mıllıon tonnasy Aqtoǵaı-1 ken baıytý fabrıkasynda, 500 myń tonnasy Aqtoǵaı-2 fabrıkasynda óndirilgen.
Aqtoǵaı-1 kásipornyndaǵy mys kontsentratynyń alǵashqy partııasy 2017 jyldyń aqpanynda shyǵaryldy. Al 2021 jyly birinshi fabrıkanyń óndiristik tájirıbesin paıdalana otyryp ekinshi fabrıka iske qosyldy.
— 1,5 mıllıon tonna mys — kompanııa úshin óte aýqymdy nátıje. Bul Aqtoǵaıdaǵy búkil komanda men tehnologııalyq protsessterdi aıtarlyqtaı jetildirgenniń arqasynda múmkin boldy. Birinshi kezeńde biz jańa qurylǵylardy meńgerip, qajetti mejege jetsek, búginde fabrıkamyz nyq senimmen jáne ozyq avtomatızatsııa jaǵdaıynda jumys isteýde, — deıdi № 1 ken baıytý fabrıkasynyń óndiristik qyzmet basshysy Dáýren Baıjigitov.
Onyń aıtýynsha, atalǵan jetistik túrli sala mamandary: operatorlar, tehnologtar, jóndeýshiler, ınjenerler men jobalaýshylardyń eńbeginiń arqasynda múmkin boldy. Kenishten rýdany turaqty jetkizý de óndiris tıimdiligin arttyrýǵa kómektesýde.
Aqtoǵaıda óndiristik kórsetkishterdi saralap, qurylǵylardyń ońtaıly jumys rejımin anyqtaýǵa kómektesetin jasandy ıntellekt júıesi qosylǵan.
Óndiristik keshen kendi óńdeý kóleminiń de artqanyn kórsetýde. 2025 jyly Aqtoǵaıda 62,1 mıllıon tonna ken óńidelip, aıtýly rekord tirkeldi. Bul — kásiporyn jumysyn bastaǵannan bergi eń joǵary jyldyq kórsetkish bolyp tabylady.
— Biz úshin bul nátıje eń aldymen komandalyq jumystyń kúshin kórsetedi. Qaýipsizdik, qyzmetkerlerdiń biliktiligi, bólimderdiń ózara yntymaqtastyǵy men nátıjege umtylys bizdiń jumys úshin asa mańyzdy ról atqarady. Biz jetistigimizdi birinshi nemese ekinshi fabrıkaǵa tıesili dep bólmeımiz. Bul — tutas Aqtoǵaıdyń jetistigi, — deıdi № 2 ken baıytý fabrıkasynyń óndiristik qyzmet basshysy Altynbek Ysqaqov.
Aqtoǵaıdaǵy keshenniń tıimdiligin ary qaraı arttyrý jabdyqtardy jetildirý, avtomatızatsııa men tsıfrlyq sheshimderdi damytý jáne mamandardyń biliktiligin arttyrýmen baılanystyrylady. Bul turǵyda jumysshylardyń qaýipsizdigi negizgi basymdyqtardyń biri bolyp qala bermek.
