Qazqonaq eskertkishine ulttyq ıgilik mártebesi berile me
ASTANA. KAZINFORM — Premer-mınıstr Oljas Bektenov Májilis depýtattarynyń Pavlodar oblysyndaǵy Qazqonaq tabıǵat eskertkishine ulttyq ıgilik mártebesin berý týraly saýalyna jaýap berdi.
— Qazqonaq memlekettik tabıǵat eskertkishi Úkimettiń 2017 jyldyń 26 qyrkúıegindegi № 593 qaýlysymen respýblıkalyq mańyzy bar erekshe qorǵalatyn tabıǵı aýmaqtar tizimine engizilgen jáne 2006 jyldyń 28 qyrkúıegindegi № 932 Úkimet qaýlysymen memlekettik tabıǵı-qoryq qory nysandarynyń tizilimine qosylǵan. Qazaqstan Respýblıkasynyń «Erekshe qorǵalatyn tabıǵı aýmaqtar týraly» Zańyna sáıkes, tabıǵat eskertkishi aýmaǵynda onyń saqtalýy men qalpyna keltirilýine baǵyttalǵan is-sharalar júrgiziledi. Búginde Ekologııa jáne tabıǵı resýrstar mınıstrligi nysannyń jaǵalaý syzyǵyn nyǵaıtý jáne kútip-ustaý jumystaryn júrgizý úshin ǵylymı uıymdardyń esepteýlerine negizdelgen bıýdjet ótinimin qalyptastyryp jatyr, — dedi Úkimet basshysy.
Onyń atap ótýinshe, 2026 jylǵa arnalǵan memlekettik bıýdjet qalyptastyrylyp qoıǵan.
Sondyqtan Ekologııa jáne tabıǵı resýrstar mınıstrligi 2027 jylǵa arnalǵan bıýdjet ótinimin daıyndaý barysynda eskertkishti saqtaý jobasyn ázirleýge qarajat bólýdi kózdep otyr.
Osy jobanyń negizinde keıinirek tıisti is-sharalar qarastyrylady.
— Qazqonaq tabıǵat eskertkishine «Ǵylymı tabıǵı nysan — ulttyq ıgilik» mártebesin berý máselesi 2026 jyldyń birinshi toqsanynda qaralady. Tıisti tapsyrmalardy berdim. Onyń nátıjeleri týraly qosymsha aqparat erekshe qorǵalatyn tabıǵı aýmaqtar salasyndaǵy ýákiletti organ tarabynan jiberiledi. Bul másele Úkimet pen Pavlodar oblysynyń ákimdigi baqylaýynda tur, — dedi Oljas Bektenov.
Aıta keteıik, jer qoınaýyn paıdalanýdyń biryńǵaı platformasy tek memlekettiń menshiginde bolady.