Qaıyrymdylyq: Túrkistan oblysynyń Jetisaı aýdanynda 6 otbasy baspanaly boldy

TÚRKІSTAN. QazAqparat – Túrkistan oblysynyń Jetisaı aýdanynda baspana taýqymetin tartyp júrgen 6 otbasyǵa barlyq jaǵdaıy jasalǵan jańa úılerdiń kiltteri tabys etildi, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Igi is Qazaqstan musylmandar dinı basqaramsynyń 30 jyldyq mereıtoıyna oraı, «Zeket» qorynyń «El úlesi – páterge» jobasy aıasynda atqaryldy.

Baspanalardyń jalpy quny 90 mıllıon teńgeni quraǵan.

«Halyq arasynda «jumyla kótergen júk jeńil» degen keremet sóz bar. Osy oraıda, árqashanda halyqtyń muń-muqtajyn tyńdap kómek berip kelgen eldiń anasy atanǵan Jamal apamyzǵa jáne onyń isin jalǵastyryp júrgen uly, belgili kásipker Baharaddın Ablazımovke eldiń atynan alǵysymdy aıtamyn. Aýdanda qaıyrymdylyq arqyly baspana syılaýdyń jarqyn úlgisin Jamal apamyz kórsetip, kópke úlgi bola bildi. Bul oraıda jergilikti turǵyndardyń erekshe belsendiligin aıta ketkenimiz abzal. Árbir baspanany salý barysynda eriktiler tobynyń jáne jomart jandardyń eńbegi erekshe. Olar irgetastyń qalanǵan sátinen turǵyn úı salynyp bitkenshe, istiń basy-qasynda júrdi. Qaıyrymdylyq jasaý arqyly aýdannyń árbir azamaty óziniń qolynda bar dúnıesimen bólisip, muqtaj azamattardyń baspanaly bolýyna óz úlesterin qosýda. Aldaǵy ýaqytta da osyndaı baspana salý úshin jer telimderin tegin bere otyryp, muqtaj jandarǵa qajetti jaǵdaıdy jasaıtyn bolamyz», - dedi aýdan ákimi Jamantaı Beısenbaev.

Baspana taýqymetin 16 jyldan beri tartyp kele jatqan jalǵyzbasty kópbalaly ana Jáýdir Tórehanova jańa qonystanýshylar atynan óz alǵysyn aıtty. Sondaı-aq, Jetisaı aýdanynyń ortalyq meshitiniń bas ımamy Jorabaı Dýlatbaev bul istiń negizgi uıymdastyrýshysy ári bastamashysynyń biri Bekzat Syzdykov syndy azamattar ekenin tilge tıek etip, aldaǵy ýaqytta da qaıyrymdylyq sharalary jalǵasyn tabatynyn jetkizdi.