Qaıyrymdylyq qory elimizde 100 turǵyn úıdiń aýlasyn qalpyna keltiredi
Qor ókilderiniń aıtýynsha, «Altyn Júrek» júldesiniń toǵyz jyldyq tarıhy bar. Osy jyldar ishinde Qazaqstan boıynsha myńdaǵan qaıyrymdy is-sharalar ótkizildi. 100 mektep salynyp, 300 sporttyq jáne balalar alańdary salyndy, júzdegen adamdardyń ómiri arashalandy.
Bıyl «Altyn júrek» júldesiniń 10 jyldyǵyna oraı uıymdastyrylatyn «Qaıyrymdy ister kerýeni» aktsııasy aıasynda belgili metsenattar jáne osy júlde laýreattarynyń kúshimen Qazaqstan boıynsha 100 turǵyn úı aýlalary qaıta jańartylady.
«Shyn mánisinde izgilikti ister isteıtin adamdar kóp. Ókinishke qaraı, sońǵy ýaqytta jaǵymsyz jańalyqtar kóbeıip ketti. Sonyń sebebinen qaıyrymdylyqqa qatysty jaqsy jańalyqtar tasada qalyp qoıyp jatyr. Ótken jyly «Altyn júrek» júldesin alýǵa úmitker retinde 150 ótinim kelip tústi. Bul, 10 jyl ishinde rekordtyq kórsetkish», - dedi «Baýyrjan» qaıyrymdylyq qorynyń úılestirýshisi Aınur Sálimbaeva.
«Altyn Júrek» júldesine úmitker maıtalmandar úshin ótinim qabyldaý altynzhurek.kz saıtynda 3 tamyzda bastalyp, 30 qyrkúıekke deıin jalǵasady.
Osylaısha, bir jyl boıy uıymdastyrýshylar elimiz boıynsha qaıyrymdy ispen udaıy aınalysatyn, Atymtaıdaı jomart tulǵalardy izdep, osy zamannyń janashyrlarynyń qataryn tolyqtyrady.
Sonymen qatar, úmitkerlerdiń kandıdatýrasyn olardyń jaqsylyǵyn, qaıyrymdylyǵyn kórgen nemese kýá bolǵan kez-kelgen adam usyna alady.
Aıta ketelik, jyl saıynǵy «Altyn Júrek» júldesin «Baýyrjan» qory 2007 jyly qaıyrymdylyqty nasıhattaý maqsatynda ómirge keldi. Jylyna baıqaý saıtyna 100-den asa ótinimder kelip túsedi. Eksperttik jáne qoǵamdyq keńes, olardyń qatarynda qaıyrymdylyq uıymdardyń jetekshileri, QR qoǵamdyq jáne mádenı qaıratkerleri ótinimderderdi qarastyryp, úmitkerlerdi irikteıdi. «Altyn Júrek» júldesi 11 atalym boıynsha taǵaıyndalady. Olar: «Jetim balalarǵa kómek», «Bilim berýdi qoldaý», «Múgedek jandarǵa kómek», «Sporttyń damýyna at salysý», «Ardagerlerge degen yqylas», «Jyl metsenaty», «Aqparattyq keńistiktegi qaıyrymdylyq», «Jyl qaıyrymdysy»,«Jyl uıymdastyrýshysy», «Densaýlyqqa qosqan úlesi úshin» jáne «Qazaqstannyń damýyna qosqan úlesi úshin» atalymy.
