Qaıyrymdylyq qory Aqmola oblystyq balalar aýrýhanasyna medıtsınalyq jabdyqtar syılady
Atalǵan qor baspasóz qyzmetiniń málimetinshe, aýrýhanaǵa ortalyqtandyrylǵan medıtsınalyq gazben jabdyqtaý júıesi, 15 reanımatsııalyq konsol, neonataldy elektrod jıyntyǵymen jabdyqtalǵan 12 monıtor, 12 shprıtstik mólsherlegish jáne 1 Pentax fıbrogastroskoby tabystaldy. Endi aýrýhana PENTAX fıbrogastroskop kómegimen asqazan-ishek joldaryndaǵy patologııalardy durys dıagnostıkalaýǵa, dárilik preparattardy egýge, keıbir hırýrgııalyq emsharalardy júrgizýge múmkindik aldy.
Aqmola oblysy densaýlyq saqtaý basqarmasy basshysynyń orynbasary Bıbigúl Myrzabekovanyń atap ótýinshe, Aqmola oblystyq balalar aýrýhanasy - bul 0-15 jas aralyǵyndaǵy balalarǵa joǵary bilikti medıtsınalyq kómek kórsetetin kópbeıindi mamandandyrylǵan mekeme. Jyl saıyn aýrýhananyń anestezıologııa, jansaqtaý jáne qarqyndy terapııa bólimshesine ortasha eseppen alǵanda 400-den 550-ge deıin naýqas bala jatqyzylady. Olardyń 60 paıyzy bir jasqa tolmaǵan balalar.
«Alaıda, eń ozyq medıtsınalyq jabdyqsyz joǵary bilikti mamandar, joǵary sapaly dári-dármekpen qamtamasyz etý mundaı jaǵdaıda kómektese almaýy múmkin. Jańa normatıvter medıtsınalyq jumysshylardyń biliktilik deńgeıine jáne de balalardyń jansaqtaý bólimsheleriniń joǵary tehnologııalyq medıtsınalyq jabdyqpen qamtamasyz etilý jaǵyna jańa talaptar qoıyp otyr. Balanyń demi taýsylyp jatqanda oǵan kómektese almaý eń qorqynyshty nárse», - dedi Bıbigúl Ómirzaqqyzy.
Aqmola oblystyq balalar aýrýhanasynyń bas dárigeri Serik Aqshalov «Asyl Mıras» qoryna alǵys bildirip, osyndaı jabdyqty satyp alýdyń mańyzdylyǵyna toqtalyp ótti.
«Asyl Mıras» qoryna zor alǵysymyzdy bildiremiz. Satyp alynǵan jabdyq kishkentaı emdelýshilerimizdiń ómirin saqtap qalýǵa úlken úlesin qosatyny sózsiz. Naqty ýaqyt tártiptemesinde táýlik boıy gemodınamıka men ınfýzııa kólemine monıtorıng jasaýǵa múmkindik beretin zamanaýı jabdyqpen (monıtorlar, ınfýzomat) ońaltý bólimshesin qamtamasyz etý arqasynda náresteniń hal-jaǵdaıyna naqty baqylaý jasap, dárilik preparattardy jyldam egýge múmkindik alyp otyrmyz, sondaı-aq, bul kishkentaı naýqastyń qaýipsizdigin saqtap, barynsha joǵary terapııalyq áserdi tıgizýge múmkindik beredi», - dedi ol.
"Asyl Mıras» qorynyń dırektory Marat Aıtmaǵambetovtiń aıtýynsha, qor mundaı kómekti osyǵan deıin Qazaqstannyń birneshe medıtsınalyq mekemelerine kórsetken.
«Ókinishke oraı, zamanaýı tehnologııalar áli elimizdiń barlyq medıtsınalyq mekemelerinde endirilmegen. Nárestelerdiń ómirin qamtamasyz etýde asa mańyzdy ról oınaıtyn osyndaı jabdyqty tabystap otyrǵanymyzǵa asa qýanyshtymyz. Bul jabdyqty 2016 jyly jazda «Charity Tour de Burabay» velosherýinen jınalǵan qaraıymdylyq qarjy esebinen satyp alyp otyrmyz. Bul - erekshe qajettilikterge ıe balalarǵa kómek kórsetýge arnalǵan baǵdarlamalarymyzdyń biri. Sondaı-aq, bizdiń qyzmetimiz aıasynda aýtızmi bar balalarǵa arnalǵan 4 ortalyq jumys jasaýda. Memleket, úkimettik emes uıymdar jáne otandyq bıznes ókilderiniń jumylyp jumys jasaýy arqasynda balalarymyzdyń ál-aýqatyn kóterýge bolatynyna bizdiń senimimiz zor», - dedi ol.
