Qaıyrymdylyq qorlarǵa qarjy túsýin jáne onyń jumsalýynyń ashyq bolýyn qamtamasyz etý qajet -Prezıdent

NUR-SULTAN. QazAqparat - Qaıyrymdylyq qorlarǵa qarjy túsýiniń jáne onyń ári qaraı jumsalýynyń ashyq bolýyn qamtamasyz etý qajet. Bul týraly QR Prezıdenti Qasym-Jomart Toqaev qaıyrymdylyq, volonterlik uıymdardyń jáne bıznes-sektordyń ókilderimen kezdesýinde aıtty, dep habarlaıdy QazAqparat.

«Qaıyrymdylyq qorlarǵa qarjy túsýiniń jáne onyń ári qaraı jumsalýynyń ashyq bolýyn qamtamasyz etý qajet. Bul baǵytta kúńgirttikke jol bermeý kerek. Qazir qaıyrymdylyq jasaıtyn azamattar men kómek alýshylardyń reestrin qurý bastamasy iske asyrylýda. Bul mindettiń barynsha naqty oryndalýyna múmkindik jasaǵan jón. Qaıyrymdylyq jobalar arqyly ótetin barlyq qarjynyń jumsalýyna aqparattyq jáne qoǵamdyq baqylaýdy qamtamasyz etý qajet», – dedi Memleket basshysy.