«Qaıyrymdylyq kerýeni» konkýrsyna ótinim qabyldaý bastaldy
Qazaqstannyń isker áıelder qaýymdastyǵynyń prezıdenti Raýshan Sársembaevanyń atap ótýinshe, konkýrsqa áleýmettik máselelerdi sheshýge úles qosyp júrgen, ózderiniń ıgi isterimen basqalardy yntalandyratyn jeke jáne zańdy tulǵalar qatysa alady. Qaıyrymdylyq qyzmetin memlekettik qoldaýmen (memlekettik grant, memlekettik tapsyrys jáne t.b.) iske asyratyn kásipkerlik sýbektilermen jeke tulǵalar konkýrsqa qatysa almaıdy.
Atap aıtqanda, ótinimderdi qabyldaý bıylǵy 29 qarashaǵa deıin jalǵasady. Ótinimderdi irikteý jumysy bıylǵy jyldyń jeltoqsan aıynda jasalady. Konkýrstyń jeńimpazdary 2020 jylǵy aqpan aıynyń sońynda, ıaǵnı Alǵys aıtý kúni qarsańynda anyqtalady.
«Qaıyrymdylyq kerýeni» bizdiń elimizde kópshilikke tanymal bola bermeıtin adamdar, batyrlardyń kóp ekenin kórsetedi. Olardyń is-áreketteri barshamyzdy tańdandyra otyryp, úlgi bola alady. Eger siz muqtaj adamdarǵa kómektesip, qıyn jaǵdaıda batyldyq tanytyp, paıdaly is-sharany ótkizýge kómektesken bolsańyz, bul saıys siz úshin!», - dedi R. Sársembaeva.
«Qaıyrymdylyq kerýeniniń» jeńimpazdary bes atalym boıynsha anyqtalady. «Asar» atalymynda qaıyrymdylyq qyzmeti halyqtyq salt-dástúrlermen baılanysty bolǵany eskeriledi. Al «Týǵan jer» atalymy aıasynda týǵan jerinde bilim, ekologııa jáne abattandyrý salalarynda, mádenı nysandardy qalpyna keltirý sekildi kómek kórsetkender anyqtalady. «Batyl júrek» atalymynda erlik, qaısarlyq tanytqan adamdar qamtylsa, «Meıirim jolynda» atalymynda óz qarajatyna adamdarǵa kómek kórsetken jandar úzdik tanylady. Munymen qosa, «Qaıyrymdylyq tarıhy» atylymyndaǵy marapat qoǵamnyń nazaryn áleýmettik problemalarǵa aýdaratyn materıaldardy usynatyn, BAQ-ta qaıyrymdylyq taqyryptaryn úzdik jarııalaǵan jýrnalısterge nemese shyǵarmashylyq toptarǵa beriledi.
Konkýrstyń uıymdastyrýshylary: QR Tuńǵysh Prezıdenti – Elbasynyń Qory, Qazaqstannyń Іsker áıelder qaýymdastyǵy, «Habar agenttigi» AQ, Respýblıkalyq «KTK» telearnasy jáne «Oqjetpes» emdeý-saýyqtyrý kesheni.
