Qaıyrymdylyq: Elordada tanymal sýretshilerdiń kartınasy satylymǵa qoıyldy

NUR-SULTAN. QazAqparat – Qazaqstandyqtar otandyq jáne sheteldik tanymal sýretshilerdiń kartınasyn satyp alý arqyly, qaıyrymdylyq is-sharaǵa óz úlesterin qosa alady, dep habarlaıdy QazAqparat tilshisi.

«Maǵan kórme uıymdastyrý arqyly sút bezi qaterli isigine shaldyqqan áıelderdi qoldaý ıdeıasy keldi. Sebebi osy aýrýdyń kesirine ájemnen aıyryldym. Jáne meniń jan qurbym da osymen aýyryp shyqty. Qurbyma dert óte qıyn soqty, árıne men bar qoldaýymdy aıamadym. Taǵy bir másele qazirgi áıelder sút bezi qaterli isiginiń qanshalyqty qaýipti ekenine asa mán bermeıdi. Mysaly, Eýropada áıelder mindetti túrde jylyna 2 ret mammografııa tekserýinen ótedi. Olar úshin bul qalypty jaǵdaı jáne aýrýdyń aldyn alady», - dedi «KULANSHI» zamanaýı óner ortalyǵynyń dırektory, kórmeni uıymdastyrýshy Leıla Mahat.

Kórmede qazaqstandyq sýretshiler Sáýlet Jánibek, Leıla Mahat jáne Sofııa Teıderdiń týyndylary, odan bólek sýretshi Ron dı Szenza (Italııa), Hannan Mılner (Izraıl), Olga Oreshnıkova (Izraıl) eńbekteri satylymǵa qoıyldy.

«Meniń sýret salýdaǵy janrym negizinen sıýrrealızm. Karantın kezinde úıde otyryp jańa baǵytty qolǵa alyp kórdim. Osylaısha portretti tańdadym. Sonyń nátıjesi búgingi kórmege qoıylyp otyr. Kartınanyń ataýy «Ánel» bul meniń dosymnyń 7 jasar qyzynyń potreti. Sýretti salýǵa 3-4 kún ýaqyt jumsaldy», - dedi otandyq sýretshi Sáýlet Jánibek.

Buǵan deıin habarlaǵanymyzdaı, elordadaǵy Beıbitshilik jáne kelisim saraıynda sút bezi qaterli isigine shaldyqqan áıelderdi qoldaýǵa arnalǵan kórme ashyldy.