Qaıyrymdy jandar qol-aıaǵy joq múgedekke úı alyp berdi

TALDYQORǴAN. QazAqparat - Almaty oblysyna qarasty Qaratal aýdanyndaǵy Úshtóbe qalasynyń turǵyny, birinshi top múgedegi Bolat Ábildınov úıli boldy. Jarymjan jannyń baspanaly bolýyna aýdandaǵy ár salada eńbek etetin qyzmetkerler qol ushyn sozǵan. Olar ortalyq meshit ımamdary ashqan arnaıy shotqa aqsha aýdarǵan, dep habarlaıdy QazAqparat tilshisi.

«Ákimdik Bolattyń baspana kezegi áli jaqyndamaǵandyqtan, oǵan kezeksiz úı  bere almaıtyndaryn jetkizgen bolatyn. Biraq bul jerde Qaratal aýdany ákimdiginiń qyzmetkerleri tarapynan jaqsy qoldaý boldy. Olar jalaqylaryn  aýdaryp, osy Bolattyń baspanaly bolýyna qol ushyn berdi. Jamaǵat, halqymyz da shamalary kelgenshe kómektesti»,  - dedi Qaratal aýdandyq ortalyq meshitiniń bas ımamy  Erik Amangeldiuly.

Bolat Ábildınov úshin arnaıy ashylǵan qorǵa 800 myń teńgege jýyq qarjy  jınalǵan. Bul qarajatqa Úshtóbe qalasynan úsh bólmeli jer úı satyp alyndy. Jer úı  jańa bolmaǵandyqtan  jóndeıtin tustary bar  eken. Kemtar azamatqa únemi qaraılasyp júretin  din ókilderi zeket qoryna túsken azyq-túlik pen birneshe qap tsement ákelip berdi.

«Baspanaǵa qol jetkizip jatyrmyn, shúkir. Ózim aqyryn-aqyryn jóndep alamyn. Jańa jyldan keıin ákimdiktiń adamdary úıdi ortalyq sý júıesine qosyp beremiz deıdi. Barlyǵyna alǵysym sheksiz», - deıdi Úshtóbe qalasynyń turǵyny Bolat Ábildınov.  

Esterińizge sala keteıik, bıyl maýsym aıynda Almaty oblysyndaǵy Úshtóbe qalasynyń turǵyny Bolat Ábıldınov ortalyqqa kelip, jergilikti bılikke narazylyq retinde óziniń múgedekterge arnalǵan arbasyn órtep jibergenin habarlaǵan bolatynbyz. 1979 jylǵy azamat otbasyn qurǵan, bir balanyń ákesi. Múgedek qol-aıaǵynan birdeı aıyrylǵan.