«Qaıyrymdy seısenbi» halyqaralyq bastamasy Qazaqstanda jalǵasyn tapty
«Qaıyrymdy seısenbi» halyqaralyq qaıyrymdylyq qozǵalysy álemde jomarttyqty damytýǵa serpin berý maqsatyn kózdeıdi. Bıylǵy qarashanyń sońǵy seısenbisinde - 27 qarasha kúni álemdegi mıllıondaǵan adamdar qaıyrymdylyq fleshmobyn ótkizý úshin birigedi. Qozǵalysty Andrea Bochellı, Sherıl Sendberg sekildi kóptegen juldyzdar qoldap otyr. Bastama aıasynda qaıyrymdylyq jasap, áleýmettik jelide #qaıyrymdyseısenbi heshtegimen bólisýge bolady.
«Ideıa 2012 jyly Batys elderinde paıda boldy. Ataýly kún retinde qarashanyń sońǵy seısenbisin tańdaýdyń ózindik máni bar, dál osy kezde jappaı satylymdar bastalady. 23 qarashadaǵy maýsymdyq jappaı satylymdardan keıin, 27 qarasha kúni qaıyrymdylyq jasaýdy úırenip jatyrmyz. Bul eshqandaı saıasat, din nemese basqa da qozǵalystarsyz adamdardy biriktiretin bastama», - deıdi «Qaıyrymdy seısenbiniń» Qazaqstandaǵy úılestirýshisi Olga Salımova.
«Keıde kóshedegi qaıyrshylarǵa aqsha beremiz, biraq olar shyn mánindegi muqtaj jandar emes, alaıaq ta bolýy múmkin. Kimge kómek berip jatqanymyzdy bilýge tıispiz. «Qaıyrymdy seısenbi» soǵan baýlıdy», - deıdi ol.
«Qaıyrymdy seısenbi» Qazaqstanda alǵash ret byltyr ótkizilgen. Bıyl aktsııaǵa byltyrǵydan kóbirek bıznesmender, úkimettik emes uıymdar, qaıyrymdy jandar qatysyp jatyr.
«Aýqymdy qozǵalystyń bir bóligi bolǵanymyzǵa qýanyshtymyz. «Qaıyrymdy seısenbi» qaıyrymdylyq isterge jurtshylyq nazaryn aýdarýǵa septigin tıgizedi», - deıdi «SOS Qazaqstannyń balalar aýyldary» qorynyń korporatıvtik fandraızeri Roza Qarabekova.
Uıymdar da, jeke tulǵalar da givingtuesdaykz.com saıtyna tirkelý arqyly bastamaǵa birdeı qoldaý kórsete alady.