«Qaıyrymdy ister marafony»: Qaraǵandy oblysy El Táýelsizdiginiń 30 jyldyǵyn qalaı atap ótedi

QARAǴANDY. QazAqparat – Qaraǵandy oblysy Qazaqstan Táýelsizdiginiń 30 jyldyǵyn qalaı atap ótetinin jáne qandaı qaıyrymdylyq aktsııalary ótkiziletini jaıly Óńirlik kommýnıkatsııalar qyzmeti alańynda ishki saıasat basqarmasynyń basshysy Erlan Qusaıyn aıtyp berdi, dep habarlaıdy QazAqparat tilshisi.

 «Osy jyldyń eń basty oqıǵasy – El Táýelsizdiginiń otyz jyldyǵy. Bizdiń mindetimiz – mereıtoıdy eń aldymen azamattarymyzdyń ál-aýqatyn jaqsartýǵa baǵyttalǵan ıgi istermen atap ótý. Eshqandaı saltanatty merekeler josparlanbaıdy», – dep atap ótti Erlan Qusaıyn. 

Táýelsizdiktiń 30 jyldyǵyn merekeleýdiń óńirlik josparyna 187 is-shara engizildi, onyń ishinde 5 halyqaralyq, 6 respýblıkalyq, 13 oblystyq jáne 163 qalalyq jáne aýdandyq is-sharalar. Sondaı-aq, oblysta «Ordaly otyz is» arnaıy jobasy quryldy.

«Qaıyrymdylyqqa kóp kóńil bólinedi. Máselen, respýblıkada «Qaıyrymdy ister marafondary« jalpyulttyq jobasy jumys isteıdi. Onyń aıasynda jyl basynan beri oblysta 21 233 adamnyń qatysýymen 2 642 is-shara ótkizildi. Jyl basynan beri qarttarǵa, jalǵyz basty analarǵa, kóp balaly, az qamtylǵan otbasylarǵa kómek kórsetildi. Olarǵa azyq-túlik sebetteri berildi. Sondaı-aq, kóptegen kásipkerler, fermerlik sharýashylyqtar, ÚEU medıtsınalyq mekemelerdi qajetti qural-jabdyqtarmen jáne dári-dármektermen qamtamasyz etý boıynsha úlken jumys atqardy. Oblys turǵyndary, eriktiler de óz úlesterin qosty», – dep atap ótti spıker.

Búgingi tańda oblysta 97 volonterlik uıym men top jumys isteıdi, olarǵa 7 myńǵa jýyq jastar kiredi. Jeke volonterlik bastamalardy bıznes-qoǵamdastyq qoldaıdy. Mysaly, «Qaıyrymdy urpaq» qaıyrymdylyq aktsııasy aıasynda 137 bala jalpy somasy 5 mıllıon teńgeden astam kómek aldy.

Taǵy bir aýqymdy ıgi ister aktsııasy – «El tiregi – Elbasy». Birinshi jartyjyldyqta 23 tonna azyq-túlik, sondaı-aq 769 birlik jeke qorǵanys quraldary taratyldy. Aktsııaǵa Oblystyń 1 500-den astam eriktileri qatysty.

«Ekologııalyq máseleler de burynǵydan da ózektirek bola tústi, sondyqtan «Birgemiz taza álem« baǵyty boıynsha «Taza tabıǵat« ulttyq jobasy iske asyrylýda. Oblysta ózender men sý qoımalaryn tazartý, aǵash otyrǵyzý boıynsha úlken jumystar atqaryldy. Jyl basynan beri óńirde osyndaı 5 myńnan astam is-shara ótkizildi. Bul jumys odan ári jalǵasatyn bolady», – dep atap ótti Erlan Qusaıyn.