Qaıyrymdy ister marafony: Qapshaǵaı tasjoly vandaldyq jazbalardan tazarady

NUR-SULTAN. QazAqparat - 4 shildede «Qaıyrymdy ister marafony» jobasynyń aıasynda «Jana Dunie» qoǵamdyq qory Qapshaǵaı tasjolyn vandaldyq jazbalardan tazartýǵa baǵyttalǵan aktsııa ótkizedi, dep habarlaıdy QazAqparat.

«Tabıǵat ta jaýap bere alady» taqyrybynda qorshaǵan ortany qorǵaýǵa arnalǵan aktsııaǵa jergilikti belsendiler, volonterler men qazaqstandyq Tik-Tok juldyzdary qatyspaqshy.

«Pandemııa men shekaralardyń jabylýy ishki týrızmdi damytýdyń jańa múmkindikterine jol ashty. Keıingi bir jarym jyldyń ishinde qazaqstandyqtardyń deni jergilikti týrıstik baǵdarlarǵa kóbirek kóńil bóle bastady. Alaıda Qazaqstannyń tabıǵı kórneki oryndary men qasıetti jerlerinde týrıster ózderinen keıin tastap ketetin qoqystar men «jartasqa jazylǵan jazýlardyń» da sany kóbeıip ketti. Osy rette ekologııalyq aktsııa qazaqstandyqtardyń nazaryn atalǵan problemaǵa aýdartyp, tabıǵatqa bastapqy kórki men biregeı sulýlyǵyn qaıtarýdy kózdeıdi», - delingen uıymdastyrýshylar taratqan relızde.

Jobaǵa «Kazakh Tourism», «Amaty VitRina», fotograftar birlestigi men qazaqstandyq tıktokerler qoldaý bildirgen. Mundaı aktsııalar Qazaqstannyń birneshe aımaǵynda, atap aıtqanda Qarqaraly memlekettik ulttyq tabıǵı parki men Býrabaıda ótken.