Qaıyrymdy ister marafony aıasynda 5 mln adamǵa ataýly kómek kórsetildi

NUR-SULTAN. QazAqparat – 5 mln otandasymyzǵa 6,2 mlrd teńgege ataýly kómek kórsetildi. Bul týraly Aqparat jáne qoǵamdyq damý mınıstri Asqar Ýmarov málim etti, dep habarlaıdy QazAqparat tilshisi.

«Birgemiz» volonterlerdiń respýblıkalyq front-keńsesi men onyń 17 óńirdegi fılıalynyń jumysyn erekshe atap ótken jón. Búginde QazVolunteer.kz platformasy volonterlik qyzmet boıynsha biryńǵaı aqparattyq resýrsqa aınaldy. Atalǵan platforma 53 myńǵa jýyq volonterdi, 1000-nan astam joba men 3,4 myńnan astam volonterlik uıymdy biriktiredi», - dedi Asqar Ýmarov elordada ótken Ortalyq Azııa elderi volonterleriniń forýmynda.

Mınıstrdiń aıtýynsha, «Birgemiz» jalpyulttyq jobasy aıasynda 8 baǵyt boıynsha volonterlik júıe quryldy.

«Tek ótken jyldyń ózinde oǵan 70 myńnan astam volonter qatysty. Janashyr qazaqstandyqtar túrli qıyndyqqa tap bolǵan balalar men jastarǵa kómektesip jatyr. Erikti azamattar medıtsına, áleýmettik jáne ekologııalyq volonterlik salasynda qol ushyn sozýda. Janýarlardy qorǵaý men materıaldyq jáne rýhanı mádenı-tarıhı murany saqtaý isinde de volonterlerdiń eńbegi zor. Sonymen qatar, volonterler tótenshe jaǵdaılarǵa tap bolǵan jandardyń ómirin saqtap qalýǵa atsalysýda», - deıdi ol.

Odan bólek, Asqar Ýmarov jalpyulttyq «Qaıyrymdy ister marafony» aktsııasy aıasynda 5 mln azamatqa 6,2 mlrd teńgege ataýly kómek kórsetilgenin aıtty.

Buǵan deıin habarlaǵanymyzdaı Qazaqstanda volonterlik týraly zańnyń oryndalýyna monıtorıng júrgizilmek.