«Qaıyrly kesh, Qazaqstan» telejobasy kóptegen jańajyldyq tosynsyı daıyndaýda
ALMATY. 26 jeltoqsan. QazAqparat - «Eýrazııa» Birinshi arnasynyń turaqty kórermenderiniń súıikti baǵdarlamasyna aınalǵan «Qaıyrly kesh, Qazaqstan» jobasy jańa jylǵa kóptegen tosynsyılar daıyndap otyr.
30 jeltoqsan kúni keshke kórsetýge daıyndalyp jatqan merekelik shyǵarylym tek sándi shyrshamen jáne túrli-tústi áshekeılengen zalmen ǵana erekshelenip qoımaıdy.
Jańa jyldyq shyǵarylymnyń ýaqyty uzartylady. ıAǵnı án de, bı de kóp bolady degen sóz. Elimizdiń estrada juldyzdarymen qatar Reseıdiń jáne Eýropanyń ataqty ánshileri bir sahnada án salady. Bul kontsert keńestik kezdegi «Shetel estradasynyń áýenderi men yrǵaqtary» degen baǵdarlamanyń formatyna uqsas ótkiziledi.
Merekelik kóńil-kúı syılaıtyn ánshashýmen qatar, júrgizýshilerdiń ázil-qaljyńdary da qatar júredi. Máselen, Tursynbek Qabatov, Oleg Gostev, Gúlnár Sılbaeva jáne Ásel Saǵatovalardan Aıaz atanyń nege shanamen emes, S-synypty mersedespen júretinin, al onyń áriptesi Santa Klaýstyń nege murjadan emes, esikten kiretinin bile alasyzdar.
Merekelik kontsertte qazaqstandyq ánshilerden Roza Rymbaeva, Aıqyn, Aıjan Nurmaǵambetova, Nurlan Abdýllın sııaqty ánshiler án shyrqaıdy.
Reseı ánshilerin Fılıpp Kırkorov, Lev Leşenko, Borıs Moıseev, «Samotsvety» toby jáne «Dıskoteka Avarııa» syndy óner maıtalmandary bastap keledi. Sondaı-aq, kórermender ıtalıandyq Ricchi e Poveri tobynyń jáne frank-kanadalyq mýzykant Garou syndy ónerpazdardy tamashalaı alady.
