Qaıyrbek Súleımenov bızneske tejeý bolyp otyrǵan máseleler týraly aıtty
Keńes tóraǵasy Qaıyrbek Súleımenovtyń aıtýynsha, búginde osy salada ákimshilik kedergiler kóp, sybaılas jemqorlyqtyń qaýpi de joǵary. Al jergilikti atqarýshy organdardyń qıturqy áreketi nátıjesinde memlekettik-jekemenshik seriktestik «birjaqty tenderge» aınalyp ketti.
Zań boıynsha eki jaq birlesip jumys isteýi kerek. Máselen, kásipker belgili bir áleýmettik nysandy salady. Al memleket, ıaǵnı jergilikti bılik onyń shyǵyndaryn birtindep ótep berýi tıis. Biraq ákimdikter osy saladaǵy jobalardy usynǵan kásipkerlerdi áýre-sarsańǵa salyp qoıady da, tapsyrysty óz tanys-tamyrlastaryna taratyp otyrady. Oǵan qosa, memlekettik-jekemenshik áriptestik salasyndaǵy jobalar kóp jaǵdaıda bilim men densaýlyqpen ǵana shekteledi. Al sýmen qamtý, energetıka, kólik, jol qurylysy, qutqarý qyzmeti, týrızm sııaqty qarjysy kóp salalarda ortaq jobalar qolǵa alynbaıdy. Mysaly, zańda arnaıy ekonomıkalyq aımaqtardyń ınfraqurylymyn memlekettik-jekemenshik áriptestik negizinde salý tetikteri bar. Biraq sońǵy úsh jyldyń ishinde osy baǵytta birde-bir joba iske asqan joq.
«Sebebi kólik, qurylys, energetıka sııaqty salalar «maıly shelpek» jerler ǵoı. Sodan ony memlekettik-jekemenshik áriptestikke bergisi kelmeıdi. Ony ashyq aıtý kerek. Kásipkerler bolsa, aqsha salýǵa daıar. Biraq ákimshilik kedergiler jol bermeı otyr», - dedi Q.Súleımenov.
Onyń sózine qaraǵanda, jergilikti bılik organdary óz basymdyǵyn paıdalanyp, qosymsha jeńildikterdi shyǵaryp alady. Sodan memlekettik-jekemenshik «áriptestiktiń tepe-teńdigi buzylady. Óıtkeni kásipkerlerge artyq shyǵyn shyǵarýǵa týra keledi. Tipti, birlesip jasaǵan jobany tartyp alý faktileri de bar.
«Mysaly, men Pavlodardan kelgen bir kásipkerdi qabyldadym. Ol memlekettik-jekemenshik áriptestik negizinde mektep salyp shyqty. Іshinde sport zal da bar. Tabysty jumys istep jatqan mektep deıdi. Aqyry ol mektebin tartyp aldy. Endi, zańdy túrde alyp qoıdy ma, ony áli zerdelep shyǵý kerek. Ol kásipker zańdy buzǵan shyǵar. Degenmen, kásipker bárin óz aqshasyna saldy, mektepti qurdy, artynan sonyń bárin alyp qoıǵan durys emes qoı. Bir qyzyǵy, dál sol jerde báribir mektepti ashyp otyr», - dep atap kórsetti Q.Súleımenov.