Qaıyrbek Óskenbaev ımporty tolyqtaı almastyrylatyn taýar túrlerin atady
Mınıstrdiń aıtýynsha, mashına jasaý salasynda aldyńǵy qatardaǵy 21 jobany iske asyrý josparlanǵan. Onyń ishindegi negizgi baǵyttar boıynsha:
- ımportty almastyrý áleýeti 130 mlrd teńge (avtomobıl shınalary, turmystyq tehnıka, kompıýterlik jıyntyqtaýyshtar, shanaqtardyń qalyptaý bólshekteri, kólikke arnalǵan áınek óndirisi, júk avtomobılderi, metall óńdeýdiń avtomattandyrylǵan jelileri, munaı-gaz jabdyǵy jáne t.b.);
- eksportqa baǵyttalǵan jobalardy júzege asyrý (avtoshınalar, shoıyn quıý, ustalyq-bandaj kesheni, planshetter men smartfondarǵa arnalǵan juqa shyny, «Belarýs» traktorlaryna arnalǵan kabınalar, alıýmınıı dıskiler, ızotermııalyq vagon-termostar, elektr tehnıkalyq jabdyq pen jınaqtaýyshtar, shaǵyn stantsııalarǵa arnalǵan joǵary voltty apparatýra jáne t. b.) eksportty ulǵaıtý áleýeti 622 mln AQSh dollary.
«Hımııa ónerkásibinde 2025 jylǵa deıin aldyńǵy qatarly 18 jobany iske asyrý josparlanyp otyr. Atalǵan jobalar kaltsıılengen soda, polıpropılen, natrıı tsıanıdi jáne mıneraldy tyńaıtqyshtar óndirýdi kózdeıdi. Olar tek ishki naryqqa ǵana emes, sondaı-aq ónim eksportyna da baǵdarlanǵan», - dedi ol.
Qaıyrbek Óskenbaev qurylys materıaldarynyń óndirisi salasynda da júzege asyrylatyn jobalarǵa toqtaldy.
«Bul rette 890 mln AQSh dollary kólemindegi ónim ımportyn almastyrýǵa, sondaı-aq eksport kólemin 206 mln AQSh dollaryna deıin ulǵaıtýǵa múmkindik beretin aldyńǵy qatarly 24 jobany iske asyrý josparda bar. Jalpy keramıkalyq plıtalar, avtoklavty gazobloktar, jylý oqshaýlaǵysh materıaldar, sendvıch-panelder sııaqty taýarlar boıynsha ımportty tolyqtaı almastyrý josparlanyp otyr. Budan basqa, elimizde buryn-sońdy óndirilmegen sanfaıans, bólmearalyq esikter, laktalǵan aǵash-jańqaly taqtalar, eden jabyndary sııaqty taýarlardyń óndirisi iske qosylatyn bolady», - dedi mınıstr.
Mınıstrdiń aıtýynsha, jobalardy iske asyrý nátıjesinde 9,1 mlrd AQSh dollary kólemindegi taýarlar boıynsha ımport almastyrylyp, shıkizattyq emes taýardyń eksport kólemi 17,2 mlrd AQSh dollaryna deıin ulǵaıtylady.
«Keramıkalyq plıtalar, kaltsıılengen jáne kaýstıkalyq soda, jylý oqshaýlaǵysh materıaldar, arnaıy koks, kalıı tyńaıtqyshtary jáne basqa da taýarlar boıynsha ımport tolyqtaı almastyrylady dep kútilýde. Ferroqorytpalardyń álemdik eksporty boıynsha 2-shi orynǵa shyǵý, bolat ımportyn 75 paıyzǵa qysqartý, maqta óńdeý kórsetkishterin 100 paıyzǵa deıin arttyrý, sondaı-aq eden jabyndary men geosıntetıkanyń ımportyn 25 paıyzǵa almastyrý josparda bar», - dedi Qaıyrbek Óskenbaev.
