Qaıyńdy kóli 10 jylda 10 metrge tómendedi – maman
TALDYQORǴAN. QazAqparat - Byltyr ǵana 40 myńnan asa týrıst arnaıy baryp, tamashalaǵan Almaty oblysyndaǵy Qaıyńdy kóli joǵalýdyń aldynda tur.
Sulý tabıǵatty kózdiń qarashyǵyndaı saqtap júrgen park qyzmetkerleri osylaı dabyl qaǵýda, dep habarlaıdy QazAqparat tilshisi.
Mamandardyń aıtýynsha, Qaıyńdy kóli 10 jyldyń ishinde 10 metrge tómendep ketken. Jetisýdyń jaýharyn saqtap qalý úshin plotına salý qajet. «Kólsaı kólderi» Memlekettik Ulttyq tabıǵı parkiniń qyzmetkerleri bul máseleni kóterip, talaı márte úkimetke hat joldaǵandaryn aıtady. Biraq esh nátıje joq. Al Almaty oblysyndaǵy dál osy Qaıyńdy kóliniń erekshe ásemdigin tamashalaý úshin týrıster alys-jaqyn shetelderden de arnaıy kelýde.
«Bul jerde demalýshylar úshin eshqandaı jaǵdaı jasalmaǵanyna qaramastan byltyr 40 myńnan asa týrıst kelse, bıyl olardyń sany eki esege ósti», deıdi park qyzmetkerleri.
«Qaıyńdy kóli 2010 jyldan beri 9 jyldyń ishinde 10 metrge deıin tómendep bara jatyr. 2011 jyldan bastap memleketke, Úkimetke, Parlamentke talaı márte hat joldaǵanbyz. Egerde qaıyńdy kóline shuǵyl shara qoldanyp, tospa salynbaıtyn bolsa, Qaıyńdy kólinen biraz jyldardan keıin ajyrap qalýymyz múmkin. Onda tabıǵattyń taǵy bir kórikti jerinen ajyrap qalýymyz múmkin»,-dedi «Kólsaı kólderi» Memlekettik Ulttyq tabıǵı parki týrızm bóliminiń bastyǵy Hamıt Ahmetov.
