Qaıyn enesi men qaıyn atasyn óltirgen oraldyqtyń isin alqabıler soty qaraıdy
ORAL. QazAqparat - Oralda burynǵy qaıyn enesi men qaıyn atasyn óltirgen turǵynnyń isin alqabıler soty qaraıtyn bolady. Bul týraly Batys Qazaqstan oblystyq qylmystyq ister jónindegi mamandandyrylǵan aýdanaralyq sotynyń aldyn ala sot talqysynda belgili boldy, dep habarlaıdy QazAqparat tilshisi.
Aqsaı qalasynyń turǵyny Rýstam Davletshın bıylǵy mamyr aıynda Oralda turatyn burynǵy áıeli Nadııanyń ata-anasyn atyp ketken bolatyn. 60 jastaǵy áıel oqıǵa ornynda kóz jumsa, 1951 jylǵy er adam keıin aýrýhanada qaıtys bolǵan edi.
BQO prokýrorynyń kómekshisi Aıgúl Moldaǵalıevanyń málim etkenindeı, ótken jylǵy jeltoqsan aıynda Davletshın myltyqty ıelenip, ony alty aı boıy zańsyz saqtaǵan.
Bıylǵy 10 mamyrda Davletshın sporttyq sómkesine qarýdy salyp alyp, Oralǵa kelgen. Áıelimen ajyrasýǵa baılanysty burynǵy qaıyn enesi men qaıyn atasyna óshikken ol, mas kúıinde sol kúni keshkisin jábirlenýshilerdiń úıine kelgen. Esiktiń qońyraýyn basqan kezde shyqqan qaıyn enesi Ǵalııa Abdrahmanovany atyp óltirgen. Sodan keıin qaıyn atasy Ranıl Abdrahmanovqa oq atyp, aýyr jaralaǵan.
R.Davletshınge QR QK 99-baby 2-bóligi 1, 5-tarmaqtaryna (asa qatygezdikpen eki jáne odan kóp adamdy qasaqana óltirý) jáne 287-baby 2-bóligine (atys qarýyn zańsyz ıelený, saqtaý jáne alyp júrý) sáıkes aıyp taǵylyp otyr.
Ol sotta kinásin moıyndap, óziniń isin alqabılerdiń qatysýymen qaraý týraly ótinish jasady. Sýdıa Baqyt Ermahanov bul ótinishti qanaǵattandyrdy. Negizgi sot talqysy 1 tamyzǵa belgilendi.
