Qaıtys bolǵan naýqastyń organdary 4 adamnyń ómirin qutqardy
ASTANA. QazAqparat - Qaıtys bolǵan naýqastyń júregi, búıregi, baýyry jáne uıqy bezi 4 adamnyń ómirin qutqardy, dep habarlaıdy QR DSM baspasóz qyzmetinen.
«2014 jylǵy 30 mamyrda Soltústik Qazaqstan oblystyq aýrýhanasyna jaǵdaıy asa múshkil, basynan aýyr jaraqat alǵan 40 jasar naýqas jetkizilgen.
Aýrýhana dárigerleri naýqastyń ómirin saqtap qalý úshin qoldan kelgenniń bárin jasaǵanymen, 10 maýsymda mıy ólgen. Týystary marqumnyń ishki aǵzalaryn transplantatsııalaýǵa ruqsat bergen soń reaktıvti ushaqpen 3 klınıkadan tranplantatsııa brıgadasy kelip jetti. Marqumnyń júregi, eki búıregi, baýyry jáne uıqy bezi alyndy.
Osy ýaqytta Astananyń úsh klınıkasyna aǵzalaryn transplanttaýǵa muqtaj úsh naýqas jatqyzylyp, daıyndyq sharalary júrgizildi. Aǵzalar Astanaǵa jetkizilip, búıregi 2 naýqasqa, júregi 1 adamǵa jáne baýyry 1 naýqasqa sátti salyndy. Ol naýqastardyń barlyǵy birneshe márte statsıonarlarda qoldaý emin alǵan, óıtkeni ómirlerin qutqarýdyń jalǵyz múmkindigi aǵzalaryn almastyrý bolǵan.
Júrek transplantatsııasyn Ulttyq ǵylymı kardıohırýrgııalyq ortalyqta ataqty kardıohırýrg, Qazaqstannyń Eńbek Eri ıÝ.Pıa jasady.
2 naýqasqa baýyr men búırekti almastyrý otasyn Ulttyq ǵylymı medıtsınalyq ortalyqta 11 maýsymda professor J.Dosqalıev atqardy.
Ekinshi búırekti sol kúni Respýblıkalyq jedel medıtsınalyq járdem ǵylymı ortalyǵynda belgili transplantolog Ǵ.Quttymuratov transplantatsııalady.
Máıit donordan aǵzalardy sátti transplanttaý sharasy Respýblıkalyq transplantologııa boıynsha úılestirý ortalyǵy, Soltústik Qazaqstan oblystyq aýrýhanasy, Astananyń jetekshi klınıkalary, Tótenshe jaǵdaılar jáne Іshki ister mınıstrlikteriniń ózara naqty úılesken áreketi arqasynda iske asyryldy», - dep jazylǵan habarlamada.
Aıta ketetin jaıt, 2014 jylǵy aqpan aıynan beri QR Densaýlyq saqtaý mınıstrligi elimizdiń 9 oblys ortalyǵynda Respýblıkalyq transplantologııa boıynsha úılestirý ortalyǵynyń ókildikterin ashty.
Óńirlik jáne statsıonarlyq mamandar Qazaqstanda transplantatsııa salasyn úılestirý boıynsha oqytý trenıngterin ótkizdi. Óńirlik ortalyqtar qazirgi ýaqytta áleýetti donorlardan aǵzalaryn alýǵa baǵyttalǵan ázirlik jumystaryn bastap ketti.
