Qaıtys bolǵan múgedek jannyń kómekshisine jarty jyl aqsha tólenip kelgen

NUR-SULTAN. QazAqparat – Jambyl oblysynyń Shý aýdanynda qaıtys bolǵan múmkindigi shekteýli jandarǵa qyzmet kórsetilgeni úshin ákimdikten aqsha bólinip kelgen, dep habarlaıdy QazAqparat aımaq prokýratýrasyna silteme jasap.

Shý aýdanaralyq prokýratýrasy ákimdiktiń Jumyspen qamtý jáne áleýmettik baǵdarlamalardy úılestirý bólimin tekserip, qaıtys bolǵan múgedekterdi ońaltý qyzmeti úshin bıýdjetten zańsyz qarajat bólinip otyrǵanyn anyqtaǵan. Máselen, birinshi toptaǵy múgedek sanatyndaǵy azamat K.-ǵa jyl sońyna deıin jeke kómekshi kelip turýy kerek bolǵan. Áleýmettik qyzmetkerge aıyna 15 myń teńge tólenýi tıis edi.

«K.osy jyldyń 25 qańtarynda qaıtys bolǵanyna qaramastan, qańtar aıynan shildege deıin jeke kómekshige memlekettik bıýdjetten zańsyz aqsha tólenip kelgen. Osylaısha, memleketke zııan keltirilgen», - dep habarlady oblystyq prokýratýradan.

Atalmysh fakti boıynsha QR Qylmystyq kodeksiniń 190-baby boıynsha (alaıaqtyq) qylmystyq is qozǵaldy.

Budan bólek, áleýmettik kómekshige muqtaj birinshi toptaǵy 6 múgedekke tıisti qyzmetter usynylmaǵan. Sondaı-aq, jumyspen qamtylǵan 16 múmkindigi shekteýli azamattan 1,3 mln teńge kóleminde tabys salyǵy ustalyp kelgeni anyqtaldy.

«Prokýratýra qabyldaǵan sharalardyń arqasynda múmkindigi shekteýli jandar ońaltý qyzmetimen qamtamasyz etildi. Zańsyz alynyp kelgen qarajat tolyq qaıtaryldy. Kináli laýazymdy adamdar jaýapkershilikke tartyldy», - dedi prokýratýradan.