Qaıtys bolǵan adamdy jerleýge jer tegin beriledi
Bul jóninde Almaty oblystyq sybaılas jemqorlyqpen kúres departamenti basshysynyń birinshi orynbasary Jandos Jumabaev málimdedi, - dep habarlaıdy QazAqparat tilshisi.
«Adamdy jerleý úshin QR Jer kodeksiniń 109 babynyń 3 - tarmaǵyna sáıkes jalpy jer árbir aýyldarda, aýdandarda alty sharshy metr mólsherinde tegin beriledi. Mysaly jer satylǵan jaǵdaıda halyq 102 nomerine habarlasý kerek»,- dedi QR Sybaılas jemqorlyqqa qarsy is-qımyl agenttiginiń Almaty oblysy boıynsha departament basshysynyń birinshi orynbasary Jandos Jumabaev.
Almaty oblysynda 957 jerleý orny bar. Mamandardyń sózinshe, tek úsheýinde ǵana arnaıy beıit basyn qaraıtyn, kútim jasaıtyn mamandar bar eken. Al qalǵan mola-zırattardyń barlyǵy ashyq-shashyq qorǵaýsyz, qorshaýsyz jatyr dep dabyl qaǵýda. Qazir memleket tarapynan beıit basyn qaraýǵa, kútim jasaýǵa arnaıy tender jarııalanýda. Sandýǵash Dúısenova sondaı múmkindikti paıdalanǵan maman. Zırattyń basyna shlagbaýmǵa deıin qoıǵan ol osylaısha beıit basynda kólikterdiń jónsiz ary-beri qatynaýyn toqtatyp, qorshaýsyz jatqan sábılerdiń beıitterin aıaqasty etýden saqtap, vandalızmmen kúresip jatqanyn aıtady. Sondaı-aq, ol ákimdik janynan jerleý rásimimen aınalysatyn arnaıy mekeme qurylsa kóleńkeli bıznespen aınalysatyndardyń jumysyna tosqaýyl qoıylatyn edi,- deıdi ol.
Al «ólimnen keıin jemqorlyq» atty brıfıng barysynda bir ǵana Almaty oblysynda jylyna 13 myńnan asa adamnyń jerlenetini belgili boldy. Qabir qazý syndy túrli jolmen nápaqa taýyp júrgendermen mamandar kúres júrgize ala ma, olardyń jumysyn bir júıege retteý múmkin be, ol ýaqyt enshisinde.
