Qaıtýǵa múmkindik berýimiz kerek – Eraly Toǵjanov Ońtústik Koreıadaǵy otandastarymyz jaıly

NUR-SULTAN. QazAqparat – Premer-mınıstrdiń orynbasary Eraly Toǵjanov Qytaı men Iran baǵytyndaǵy áýe reısteri toqtatylǵanymen, nelikten Ońtústik Koreıa baǵytynda tek shektelgenin túsindirip berdi, dep habarlaıdy QazAqparat tilshisi.

«Álbette Qytaı sekildi emes, Ońtústik Koreıaǵa áýe reısteri nelikten tek shektelgeni jaıly suraqtar qoıylyp jatyr. Ol jaqta osyǵan deıin aıtylǵanyndaı 35 myńǵa tarta Qazaqstan azamaty júr. Olarǵa Otanyna oralýǵa múmkindik berýimiz kerek. Olar úshinshi memleket arqyly da eline qaıta alady», - dedi Eraly Toǵjanov Úkimettiń baspasóz ortalyǵynda tilshilerdiń suraǵyna jaýap bere otyryp.

Úkimet basshysynyń orynbasarynyń aıtýyna qaraǵanda, Ońtústik Koreıada oqıtyn stýdentterdiń kóbi qazir kanıkýlda – Qazaqstanda júr.

«Kanıkýlda júrgen stýdentterdiń jaǵdaıy jaqsy. Kóbi Qazaqstanda. Myńǵa tarta stýdentke Ońtústik Koreıaǵa barmaı-aq qoıýǵa keńes berdik. Bilim jáne ǵylym mınıstrligine stýdentterdiń oqý merzimin uzartýǵa qatysty sondaǵy JOO basshylarymen kelisý boıynsha naqty tapsyrma berildi», - dedi ol.

Aıta ketsek, buǵan deıin QR Syrtqy ister mınıstriniń birinshi orynbasary Shahrat Nuryshev Qazaqstan azamattary koronavırýs ınfektsııasy ýshyqqan Iran men Ońtústik Koreıa elderinen ázirge evakýatsııalanbaıtynyn habarlaǵan edi.