Qaıtys bolǵannan keıin donor bolýǵa kelisim bergender sany artty

ASTANA. KAZINFORM – Qazaqstanda transplantologııany damytý úshin ınstıtýtsıonaldyq jáne kadrlyq baza qalyptastyryldy. 2026 jylǵy 1 qańtardan bastap elde keratoplastıka jáne gemopoezdik diń jasýshalaryn aýtologııalyq transplantattaýdy qosa alǵanda, transplantattaý qyzmetteriniń tizbesi keńeıtildi.

2025 jylǵy 14 shildedegi «MÁMS jáne medıtsınalyq qyzmetter kórsetý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» Zańǵa sáıkes medıtsınalyq kómektiń bul túrleri endi memlekettik ǵana emes, sonymen qatar tıisti lıtsenzııasy bar jeke medıtsınalyq uıymdarda da kórsetilýi múmkin.

Densaýlyq saqtaý mınıstrligi málimetinshe, salany damytý sheńberinde medıtsınalyq kómekti uıymdastyrý standarttary, sondaı-aq aǵzalardy, tinder men jasýshalardy alý, daıyndaý, saqtaý, konservatsııalaý jáne transplantattaý qaǵıdalary men sharttary qaıta qaraldy.

2025 jyly aǵza donorlarynyń sany úsh esege — 6-dan 18-ge deıin, al transplantattaý sany 2,4 esege - 23-ten 68 operatsııaǵa deıin ósti. eGov.kz portalynda ornalastyrylǵan azamattardyń nıet bildirýiniń oń dınamıkasy baıqalady.

Ótinishterdiń jalpy sany 38%-ǵa ósti. Bul rette qaıtys bolǵannan keıingi donorlyqqa kelisimder sany 70%-ǵa, al bas tartýlar sany 26%-ǵa ósti. Bul osy másele boıynsha halyqtyń habardar bolýynyń óskenin kórsetedi. Sonymen qatar transplantattaýdy kútý paraǵynda qazirgi ýaqytta 4506 patsıent, onyń ishinde 123 bala bar. Osyǵan baılanysty halyqpen belsendi aqparattyq-túsindirý jumystary jalǵasyp jatyr.

Aıta keteıik, Almaty oblysynda donor birneshe adamnyń ómirin qutqaryp qaldy.

Mańǵystaýda alǵash ret máıittik donor tirkeldi.

ShQO-da qaıtys bolǵan eki donor 12 qazaqstandyqtyń ómirin saqtap qaldy.