Qaıtys bolǵan ájesiniń atynan zeınetaqy alyp kelgen aqmolalyq sottaldy

KÓKShETAÝ KAZINFORM - Aqmola oblysynyń turǵyny  qaıtys bolǵan ájesiniń atyna 3 jyl boıy zańsyz zeınetaqy alyp kelgen. Prokýrorlyq sharalardyń nátıjesinde er adamnyń qylmysy áshkerlenip, 3 jylǵa bas bostandyǵynan aıyrý jazasyna kesildi.

Aqmola oblysy prokýratýrasy baspasóz qyzmetiniń málimetinshe, zeınetaqymen qamtamasyz etý máselesi boıynsha júrgizilgen taldaý barysynda 1937 jylǵy zeınetkerdiń 2021 jyly Zerendi aýylynda qaıtys bolǵany anyqtaldy. Óz kezeginde qaıtys bolǵan adamnyń týǵan nemeresi, paıdakúnemdik nıetpen, jeke baıý maqsatynda qaıtys bolý deregin ýákiletti organdardan jasyryp, qaıtys bolǵan adamnyń zeınetaqy bank kartasyn paıdalanyp, zeınetaqy tólemderin júıeli túrde alyp otyrǵan. Osylaısha, ol 4 mln teńgeden astam qarajat urlap, memleketke iri mólsherde zalal keltirgen.

«Osy derek boıynsha Zerendi aýdanynyń prokýratýrasy Qylmystyq kodekstiń 1-tarmaǵynyń 190-baby 3-bóligi boıynsha sotqa deıingi tergep-tekserdi (alaıaqtyq, ıaǵnı bótenniń múlkin urlaý nemese iri mólsherde jasalǵan aldaý arqyly bótenniń múlkine quqyq alý). Zerendi aýdandyq sotynyń úkimimen qaskúnem Qylmystyq kodekstiń 190-baby 3-bóligi boıynsha kináli dep tanyldy jáne oǵan ortasha qaýipsizdik mekemesinde jazasyn óteý arqyly, 3 jylǵa bas bostandyǵynan aıyrý jazasyna kesti, sondaı-aq kórsetilgen zalal somasy memleket kirisine óndirildi», - dedi vedomstvodan.

Aıta ketsek, budan buryn Aqmola oblysynda alaıaqtyq jasady degen kúdikpen túrme bastyǵy ustalǵanyn jazǵan edik.