Mıkroqarjylyq uıymdar men baılanys operatorlaryna qatysty 71 qylmystyq is qozǵaldy

ASTANA. KAZINFORM – Bas Prokýror Berik Asylovtyń tóraǵalyǵymen Qazaqstan Respýblıkasynyń zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótkizilip, onda ınternet-alaıaqtyqqa qarsy is-qımyl máseleleri qaraldy.

Keńeste ótken jyly myńdaǵan qazaqstandyqtar kıberalaıaqtardan zardap shekkeni aıtyldy.

Sengish azamattardy aldaý úshin zamanaýı IT-tehnologııalar men psıhologııalyq manıpýlıatsııalar keńinen qoldanylady.

- Telefon alaıaqtary Almaty qalasynda 82 jastaǵy zeınetkerdi 67 mln teńgege qatarynan 14 tranzaktsııa jasaýǵa kóndirgen. Olar ózderin kúshtik organdardyń qyzmetkerleri dep tanystyryp, jábirlenýshige onyń shottary arqyly jasalǵan terrorıstik shabýyl týraly habarlaǵan. Budan bólek, qaıtys bolǵan adamdarǵa jáne bizdiń elde eshqashan bolmaǵan sheteldikterge bıometrııa ótkizbesten mıkroqaryzdar berý faktilerine jol berilip jatyr, banktik shottar resimdelip, olar arqyly kóptegen alaıaqtyq tranzaktsııa ótip jatyr, - delingen Bas prokýratýra habarlamasynda.

Mysaly, Aqtóbe oblysynda «Kredıt 365 Kazahstan» jáne «Avto Syılyq» mıkroqarjylyq uıymdary bıometrııasyz 2023 jyldyń shildesinde qaıtys bolǵan azamatqa mıkroqaryzdar resimdegen.

Bas Prokýrordyń tapsyrmasy boıynsha ótken jyldyń jeltoqsan aıynan bastap ókilettikterin teris paıdalanǵany jáne mindetterin tıisinshe oryndamaýy saldarynan azamattardyń alaıaqtar aılasyna túsýine ákep soqqan mıkroqarjylyq uıymdar men baılanys operatorlaryna qatysty 71 qylmystyq is bastaldy.

Ustalǵan adamdar bar.

- Batys Qazaqstan oblysynda elimizge eshqashan kelmegen Ýkraına azamatyna shot ashqan ekinshi deńgeıdegi bankiniń 2 qyzmetkerine qatysty qylmystyq is tergelip jatyr. Osy tulǵanyń shotyna jábirlenýshiler ózderiniń jınaǵan qarajattaryn aýdaryp otyrǵan (zalal 1 mıllıon teńge), - delingen habarlamada.

Qazirgi ýaqytta bank qyzmetkerleri ókilettikterin teris paıdalandy dep kúdikti bolyp tanyldy (QK-niń 250-baby).

- Bılaın, Tele-2 uıaly baılanys operatorlarynyń qyzmetkerleri men olardyń dıstrıbıýterlerine qatysty QK-niń 211 jáne 254-baptary boıynsha 4 is qozǵaldy: BQO-2, Qaraǵandy men Almatyda bireýden. Olar alaıaqtarǵa azamattardy aldaý úshin paıdalanylǵan myńdaǵan sım-kartalardy tirkeýge kómektesken, - delingen habarlamada.

Eske salsaq BQO-da prokýratýranyń aralasýymen 468,5 mln teńge memleketke qaıtarylǵan edi.