Qaıtys bolǵan adamnyń nesıesin kim tóleıdi
ASTANA. KAZINFORM – Qaryz alýshy qaıtys bolǵan jaǵdaıda onyń nesıesi avtomatty túrde joıylmaıdy. Eger artynda mura qalsa jáne ony muragerleri qabyldasa, nesıe boıynsha qaryz da sol muramen birge ótedi. Alaıda murager marqumnyń qaryzyn tolyq óteýge mindetti emes. Bul týraly Kazinform agenttiginiń resmı saýalyna Qarjy naryǵyn retteý jáne damytý agenttiginiń Syrtqy kommýnıkatsııalar basqarmasynyń basshysy Oljas Ramazanov aıtty.
Onyń túsindirýinshe, adam qaıtys bolǵannan keıin onyń úıi, kóligi nemese basqa da múlki ǵana emes, keıbir mindettemeleri de muraǵa qalady. Kredıt boıynsha bereshek te solardyń qataryna jatady. Sondyqtan qaryz alýshynyń qaıtys bolýy kredıtti óteý mindetin toqtatpaıdy.
Biraq murager marqumnyń qaryzyn óz qarajaty esebinen tolyq óteýge mindetti emes. Ol qaryzdy ózine qalǵan muranyń quny kóleminde ǵana óteıdi.
– Mura qaldyrýshynyń mindettemeleri muragerlerge qabyldanǵan muranyń quny sheginde aýysady. Mura bolmaǵan nemese mura qabyldanbaǵan jaǵdaıda qaıtys bolǵan adamnyń muragerlerinde onyń qaryzdaryn tóleýge negizder bolmaıdy, - dedi ol.
Osylaısha, marqumnyń qaryzy muraǵa qalǵan múliktiń qunynan kóp bolsa da, muragerdiń jaýapkershiligi mura qunynan aspaıdy.
Aıta keteıik, Qazaqstandyqtar nesıeden 14 kún ishinde aıyppulsyz bas tarta alady.
