Qaıtys bolǵan adamdarǵa qyzmet kórsetilgen: Pavlodarda medıtsınalyq klınıka tergelip jatyr
PAVLODAR. KAZINFORM — Pavlodarda jeke klınıka azamattarǵa kórsetilgen qyzmetter týraly jalǵan derekterdi engizip, bıýdjetten negizsiz qarajat alǵan degen kúdikke ilindi. Aldyn ala esep boıynsha, memleketke keltirilgen zalal 15,2 mln teńge.
Óńirlik ekonomıkalyq tergep-tekserý departamentiniń málimetine sáıkes, medıtsınalyq uıym 2023–2024 jyldary azamattardy is júzinde kórsetilmegen nemese negizsiz tirkelgen medıtsınalyq qyzmetter boıynsha esepke engizgen bolýy múmkin.
— Anyqtalǵan kúmándi derekterdiń arasynda qaıtys bolǵan adamdarǵa medıtsınalyq qyzmet kórsetildi degen jazbalar, er adamdarǵa gınekologııalyq qyzmet kórsetilgeni týraly málimetter jáne osy emhanaǵa tirkelmegen azamattarǵa qyzmet kórsetilgeni jónindegi derekter bar.
Qylmystyq is aıasynda medıtsınalyq uıymnyń basshylyǵy men dárigerleriniń yqtımal qatysy da tekserilip jatyr. Qazir tergeýshiler osy mekemeden medıtsınalyq qyzmet alǵan kóptegen azamattyń derekterin zerdelep jatyr, — dep habarlady vedomstvodan.
Ázirshe kúdiktiler resmı túrde anyqtalmaǵan. Qylmystyq is boıynsha tergeý jalǵasyp jatyr.
Eske sala keteıik, Almatydaǵy jeke klınıka jalǵan medıtsınalyq anyqtama bergeni úshin tekseriledi.
