Qaıtarymsyz nesıeden arylǵan bank salyqtan bosatylady - UB Tóraǵasy
ASTANA. QazAqparat - Qazaqstanda qaıtarymsyz nesıeden arylǵan bank salyqtan bosatylatyn bolady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq banki Tóraǵasy Qaırat Kelimbetov málim etti.
Onyń atap ótýinshe, aldaǵy ýaqytta Qazaqstannyń qarjy salasyn damytýdyń 2030 jylǵa deıingi tujyrymdamasyn daıarlaý jumysyna negizgi basymdyq beriledi. Atalǵan qujattyń negizinde 2008-2010 jyldary bolǵan qarjy daǵdarysyn eńserý sharalary jatyr. "Ol kezde turǵyn úı salasynda nesıelerdiń kólemi kúrt artyp ketken. Sodan jumys istemeıtin nesıeler kóbeıdi. Búginde ondaı nesıelerdiń jalpy kólemi 33 paıyzdy qurap otyr. Bul - tym joǵary kórsetkish. Osyǵan oraı, biz naqty jumysty qolǵa alyp, Salyq kodeksine alǵashqy ózgeristerdi engizdik. Qazir ol jumys aıaqtalýǵa jaqyn. Sonyń arqasynda "jaman" (qaıtarylmaıtyn - avt.) nesıelerden qutylǵan bankter salyqtan bosatylady", - dedi Q.Kelimbetov. Ulttyq bank Tóraǵasy atap kórsetkendeı, búginde problemalyq nesıeler qory quryldy. Memleket basshysynyń sheshimi boıynsha oǵan 250 mıllıard teńge quıylady. "Ol aqshaǵa tıisti kómek kórsetiledi. Biraq bankter aldymen jumys istemeıtin nesıelerden qutylýy tıis. Negizi, 2016 jylǵy qańtardyń 1-inen bastap jumys istemeıtin nesıelerdiń jalpy kólemi 10 paıyzdan aspaýy tıis. Sol kezde bul naqty talap bolady. Eger bankter ol talapty oryndamasa, onda olar óz lıtsenzııalarynan aıyrylýy ábden múmkin", - deıdi UB Tóraǵasy.
