Qaıtarylǵan aktıvterdi basqaratyn memlekettik qor qurylmaq

ASTANA. QazAqparat – Qaıtarylǵan aktıvterdi basqaratyn memlekettik qor qurylmaq. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

Úkimet basshysy jaýabynda «Zańsyz satyp alynǵan aktıvterdi memleketke qaıtarý týraly» zań jobasynda aktıvterdi qaıtarýdyń erikti jáne májbúrli eki tásili kózdelgenin atap ótedi.

«Erikti tártip úshin aktıvterdi memleketke berýdi yntalandyrý tetikteri ázirlengen. Májbúrli tártip sottardyń sheshimderi negizinde nemese halyqaralyq ózara is-qımyl arqyly qylmystyq ne azamattyq is júrgizý aıasynda zańsyz satyp alynǵan aktıvterdi tárkileýdi kózdeıdi. Qaıtarylǵan aktıvterdi basqarý maqsatynda zań jobasynda qaıtarylǵan aktıvterdi satýdan túsken aqshany jınaqtaıtyn qazynashylyq organdarynda arnaıy shot asha otyryp, memlekettik qor qurý kózdeledi. Bul qarajat el halqynyń ál-aýqatyn arttyrýǵa baǵyttalǵan áleýmettik jáne ekonomıkalyq jobalardy qarjylandyrý úshin ǵana paıdalanylatyn bolady», -dedi Álıhan Smaıylov.

Budan basqa, onyń atap ótýinshe, zańnyń ilespe jobasynda aktıvterdi zańsyz shyǵarýǵa yqpal etken sebepter men jaǵdaılardy joıýǵa baǵyttalǵan qajetti is-sharalar qabyldaý úshin birqatar zańnamalyq aktilerge ózgeris engizý josparlanǵan.

«Zań jobasy aktıvterdi qaıtarýdyń múldem jańa tásilderi men tetikterin kózdeıtinin eskere otyryp, ony muqııat zertteý men ázirleý úshin qosymsha ýaqyt qajet boldy», - dedi Premer-Mınıstr.