Qaıtarylǵan aktıvterdi basqaratyn kompanııanyń qurylýy oryndy - sarapshy

ASTANA. QazAqparat – Ekonomıka ǵylymdarynyń doktory Vıacheslav Dodonov «Qaıtarylǵan aktıvterdi basqarý jónindegi kompanııa» jaýapkershiligi shekteýli seriktestiginiń qurylýyna oraı pikir bildirdi, dep habarlaıdy QazAqparat tilshisi.

«Zańsyz shyǵarylǵan aktıvterdi qaıtarý protsesi bar bolsa, demek mundaı kompanııanyń qurylýy da aqylǵa qonymdy. Meniń túsinýimshe, bul kompanııa memleketke tıesili atalǵan aktıvterdi basqaryp, saqtalýyn qamtamasyz etedi. Sonymen qatar, olardyń qaıta urlanyp, syrtqa shyqpaýyna, laıyqty deńgeıde saqtalýyna qadaǵalaý júrgizedi. Ol jerde tehnıkalyq ta másele bar. Memlekettiń zańsyz operatsııalarmen kúresi aıasynda óndirip alynatyn ózge qarajattar sııaqty bul qarajattar da memlekettiń kirisine túsedi», - dedi Vıacheslav Dodonov agenttik tilshisine telefon arqyly bergen suhbatynda.

Onyń atap ótýinshe, bul kompanııa tárkilengen múlikterdi satýmen aınalysýy múmkin.

«Aktıvter ártúrli bolǵandyqtan, atalǵan kompanııaǵa birtindep múlikterdi satýǵa, ıaǵnı ony qarajatqa aınaldyrýǵa týra keletin sııaqty. Al qarajat memlekettik esepshottarda, múmkin qandaı da bir arnaýly qorda jınaqtalar. Biraq, odan keıin qarajat bıýdjetke túsip, bıýdjette qarastyrylǵan maqsattarǵa, onyń ishinde áleýmettik salaǵa shyǵyndalady dep oılaımyn», - dedi ol.