Qaıtarymsyz grant alý úshin qandaı talaptar bar – maman keńesi
ASTANA. KAZINFORM — Qazaqstanda qaıtarymsyz grant arqyly kásip bastaıtyn azamattarǵa qoıylatyn talaptar kúsheıtilgen. Mamandardyń aıtýynsha, qazirgi tańda memleket áleýmettik kásipkerlik baǵytyndaǵy jobalarǵa basymdyq berip otyr. Bıznes-jattyqtyrýshy Samal Atageldi qaıtarymsyz granttardyń negizgi maqsatyn túsindirdi.
– Eger siz belgili bir jobany júzege asyrǵyńyz kelse, grant sol ıdeıaǵa beriledi. Kásipti bastap, ony aıaqqa turǵyzǵannan keıin atqarylǵan jumys boıynsha esep tapsyrasyz. ıAǵnı eshkimge aqsha negizsiz berilmeıdi, – deıdi ol Jibek Joly telearnasynyń «Búgin LIVE» baǵdarlamasyna bergen suhbatynda.
Sarapshynyń aıtýynsha, grant alyp, kásibin bastap, keıin jumysyn toqtatyp jatqan azamattar da kezdesedi.
– Statıstıkaǵa súıensek, grant alyp, kásip bastap, kóp uzamaı jumysyn toqtatyp jatqan adamdar da az emes. Ádette kásip ashqysy keletin azamattarǵa 1-1,5 mln teńge kóleminde qarajat beriledi. Ony óndiris, saýda nemese qyzmet kórsetý salasyna jumsaýǵa bolady. Alaıda óndiris salasyn bastaý úshin 1 mln teńge jetkiliksiz. Al qyzmet kórsetý baǵytynda oqý ortalyqtary, sán salondary nemese kondıterlik ónim shyǵarý sekildi kásipter ashýǵa múmkindik bar, – deıdi bıznes-jattyqtyrýshy.
Onyń málimetinshe, búginde Qazaqstanda qaıtarymsyz granttardyń 15-ten astam túri bar. Grant kólemi jobanyń aýqymyna qaraı 1 mln teńgeden 100 mln teńgege deıin jetedi.
– Qazir qaıtarymsyz granttardyń talaptary birshama kúsheıtilgen. Grant alǵysy keletin azamat áleýmettik kásipker nemese áleýmettik osal top ókili bolýy kerek. Bizdiń elde 15-ten astam qaıtarymsyz grant túri bar. Onyń kólemi 1 mln teńgeden 100 mln teńgege deıin jetedi. Mysaly, 100 mln teńgelik granttar iri óndiris oryndaryna berilse, 1 mln teńgelik granttar shaǵyn kásip bastaýshylarǵa arnalǵan, – deıdi Samal Atageldi.
Mamannyń pikirinshe, qazirgi tańda áleýmettik kásipkerlik baǵytyndaǵy jobalarǵa memleket tarapynan qoldaý joǵary. Alaıda mundaı granttardy alý úshin qoǵamǵa paıdaly jobalar usynyp, áleýmettik osal toptaǵy azamattardy jumyspen qamtý qajet.
– Qazir Qazaqstanda áleýmettik kásipkerlerge erekshe qoldaý kórsetilip jatyr. Sondyqtan olar shamamen 5 mln teńgege deıin grant ala alady. Ol úshin qoǵamǵa paıdaly áleýmettik jobalar ázirlep, áleýmettik osal toptaǵy adamdardy jumyspen qamtý qajet. Alaıda mundaı talaptarmen bári birdeı kelise bermeıdi. Qujat jumysy da kóp. Sondyqtan grantqa ǵana senbeı, kásip bastaǵysy keletin adam ózi turatyn óńirde qandaı sala suranysqa ıe ekenin zerttep, sol baǵytta jumys istegeni durys, – deıdi ol.
Buǵan deıin «Táýelsizdik urpaqtary» grantyna qalaı qatysýǵa bolatyny týraly jazǵan edik.
