Qaıtarylmaıtyn ushaq bıletteri boıynsha ózgeris engizý usynyldy - Qoǵamdyq palata

ASTANA. KAZINFORM – Búgin Májiliste avıatsııalyq qyzmet máselesin talqylaý kezinde Qoǵamdyq palata tóraǵasynyń orynbasary Ǵalym Baıtoq avıaparkke qatysty pikir aıtty.

- Qaıtarylmaıtyn bıletter taqyryby - prıntsıptik másele. Bul rette, mınıstrliktiń ustanymy men qoǵamdyq suranys qıyspaıdy. Qaıtarylmaıtyn bıletter máselesi boıynsha barlyq táýekel jolaýshyǵa aýdarylǵan. Tipti mańyzdy ómirlik jaǵdaılarda da qarajatty qaıtaryp alý múmkindiginen aıyrady. Avıatsııa - qarjylyq qural emes, áleýmettik mańyzdy kólik túri. Memleket kelisimsharttyń álsiz tarapyn - azamatty qorǵaýǵa mindetti, - dedi Ǵ. Baıtoq Parlamenti Májilisi janyndaǵy Qoǵamdyq palata otyrysynda.

Onyń paıymynsha, bul másele boıynsha tıisti sheshim jasaý kerek.

- Bizdiń usynys aıqyn, ishki reısterdegi qaıtarylmaıtyn bıletterge tyıym salý kerek nemese kepildendirilgen qaıtarym qamtamasyz etilýi tıis. Sondaı-aq osy máselede áýe kóligimen saparlaý kúnin tegin ózgertýdi pysyqtaýǵa bolady, - dedi sarapshy.

Budan buryn habarlanǵandaı, QR Kólik mınıstri Nurlan Saýranbaev FlyArystan-nyń burynǵy qyzmetkeriniń ushaq bıletine qatysty jarııalaǵan aqparaty tekserilip jatqanyn aıtty.