Qaıtarylǵan jerdiń jańa qojaıyndary konkýrs negizinde anyqtalady – Aıdarbek Saparov

ASTANA. KAZINFORM – Elimizde qaıtarylǵan jerlerdiń jańa qojaıyndary jer komıssııasynyń qatysýynsyz, tsıfrlyq platforma arqyly konkýrstar negizinde anyqtalady. Bul týraly QR Aýyl sharýashylyǵy mınıstri Aıdarbek Saparov aıtty.

— Aýyl sharýashylyǵy jerlerin bólýdiń ashyqtyǵyn qamtamasyz etý úshin jer komıssııasynyń qatysýynsyz tsıfrlyq platforma arqyly konkýrstar ótkizý boıynsha jer zańnamasyna túzetýler ázirlendi. Sondaı-aq, konkýrsqa qatysýshylar úshin talaptar kúsheıtildi. Memleket basshysynyń tapsyrmalaryn oryndaý úshin jer resýrstarynyń biryńǵaı tsıfrlyq kartasy jáne jasandy ıntellektini qoldana otyryp, aýyl sharýashylyǵy jerleriniń spýtnıktik monıtorınginiń salalyq aqparattyq júıesi qurylatyn bolady, - dedi ol Úkimet otyrysynda.

Sondaı-aq mınıstr ıesiz jerlerdi qaıta bólý sharalary qolǵa alynǵanyn aıtty.

— Qaıtarylǵan 13,7 mln gektar jerdiń búgingi kúni 6,2 mln gektary bólindi, 7,5 mln. gektar qaıta bólinedi. Árbir óńirge qalǵan jerlerdi qaıta bólý boıynsha kórsetkishter bekitildi, ákimdikter josparlardy bekitip, jergilikti turǵyndardyń jaıylymdarǵa qajettiligin eskere otyryp, olardy oryndaýy qajet. Mınıstrlik Memleket basshysynyń tapsyrmalaryn oryndaý boıynsha barlyq qajetti sharalardy qabyldaıtyn bolady, - dedi Aıdarbek Saparov.

Aıta keteıik, keshe Memleket basshysy Joldaýda eldegi qaıtarylǵan jerdiń bárin kelesi jyldyń ortasyna deıin turaqty aınalymǵa engizýdi tapsyrǵan bolatyn.