Qaıtarylǵan aktıvter:SQO-da 33 áleýmettik joba iske asyrylyp jatyr

PETROPAVL. KAZINFORM – Soltústik Qazaqstan oblysy Petropavl qalasynyń «Jas Órken» shaǵyn aýdanynda zamanaýı balabaqsha salynyp jatyr. Bul týraly Soltústik Qazaqstan oblysynyń prokýratýrasy habarlady. 

Bas prokýratýra Úkimetpen birlesip Qazaqstan halqynyń ıgiligi úshin aktıvterdi qaıtarý boıynsha aýqymdy jumys istep jatyr.

Búgingi tańda qaıtarylǵan qarajat esebinen búkil el boıynsha bilim berý, densaýlyq saqtaý, sport jáne kommýnaldyq sharýashylyq salalarynda birqatar áleýmettik jobalar iske asyrylyp jatyr.

Bul jobalardyń árqaısysy azamattardyń ómir súrý sapasyn jaqsartýǵa baǵyttalǵan qadam.

— Soltústik Qazaqstan oblysynda osyndaı jarqyn mysaldardyń biri — Petropavl qalasynyń «Jas Órken» shaǵyn aýdanynda zamanaýı balabaqsha salynyp jatyr. Bul nysan 280 balaǵa esigin ashyp, olardy erte damý men sapaly mektepke deıingi bilim alý úshin qolaıly jaǵdaılarmen qamtamasyz etedi. Jobany iske asyrý qadaǵalaý organynyń baqylaýynda. Ornatylǵan beınebaqylaý kameralarynyń arqasynda prokýratýra qyzmetkerleri onlaın rejımde qurylys jumystarynyń barysyn baqylaıdy jáne kez kelgen zań buzýshylyqtarǵa jedel den qoıady, — delingen habarlamada.

Prokýratýranyń málimetinshe mundaı tsıfrlyq tásil oń nátıje berip jatyr. Merdigerlik uıymnyń jaýapkershiligi men tártibi artqan.

Budan basqa, Úkimet Soltústik Qazaqstan oblysy úshin aýyldyq eldi mekenderde sýmen jabdyqtaýdyń taratýshy jelilerin salýǵa jáne rekonstrýktsııalaýǵa baǵyttalǵan qosymsha 32 jobany maquldady.

Osy jobalardy iske asyrý myńdaǵan aýyl turǵyndaryn halyqtyń densaýlyǵy men ál-aýqatyna tikeleı áser etetin resýrs — taza aýyz sýmen qamtamasyz etedi.

Aıta ketelik qaıtarylǵan aktıvter esebinen dárigerlik ambýlatorııalardyń qurylysy bastalǵany týraly jazǵan edik.