Qaıtarylǵan aktıvtermen Talasta ambýlatorııa men sý qubyry salyndy
ASTANA.KAZINFORM -Jambyl oblysynyń Talas aýdanynda memleketke qaıtarylǵan aktıvter esebinen bólingen qarajatqa eki áleýmettik nysannyń qurylysy aıaqtalyp, densaýlyq saqtaý salasyndaǵy taǵy bir iri joba júzege asyrylyp jatyr.
Qazirgi tańda Talas aýdandyq ortalyq aýrýhanasyn rekonstrýktsııalaý jumystary júrgizilip jatyr. Jobanyń jalpy quny 2,6 mlrd teńge. Onyń 2,3 mlrd teńgesi memleketke qaıtarylǵan aktıvter esebinen qarjylandyryldy.
Rekonstrýktsııa aıaqtalǵannan keıin medıtsınalyq mekemeniń materıaldyq-tehnıkalyq bazasy edáýir jańartylyp, medıtsınalyq kómektiń sapasy men qoljetimdiligi artady. Nátıjesinde aýdannyń 50 myńnan astam turǵyny zamanaýı talaptarǵa saı medıtsınalyq kómek alý múmkindigine ıe bolady.
Sonymen qatar, búginde eki áleýmettik mańyzy bar nysannyń qurylysy tolyq aıaqtalyp, paıdalanýǵa berildi.
Atap aıtqanda, Aqkól aýylynda 1 800 turǵynǵa qyzmet kórsetýge arnalǵan jańa dárigerlik ambýlatorııa ashyldy.
Endi aýyl turǵyndary eldi mekennen shyqpaı-aq sapaly alǵashqy medıtsınalyq-sanıtarııalyq kómekti óz aýylynda ala alady.
Sondaı-aq Qarataý aýyldyq okrýgine qarasty Qaroı aýylynda sý qubyry jelisiniń qurylysy tolyq aıaqtaldy. Atalǵan jobanyń júzege asýyn aýyl turǵyndary 90 jyl boıy kútken bolatyn.
Jobanyń jalpy quny shamamen 1 mlrd teńge. Joba nátıjesinde 230 aýyl turǵyny sapaly aýyz sýmen qamtamasyz etildi.
Barlyq nysandardyń qurylysy men bólingen qarajattyń tıimdi jumsalýy oblys prokýratýrasynyń turaqty baqylaýynda.
Aıta ketelik Almatyda qaıtarylǵan aktıvter esebinen 49,3 km sý jáne káriz jelisi jańartyldy.
