Qaıtarylǵan aktıvterdi satýdan túsken qarajat qaıda jınaqtalady
Qaıtarylǵan aktıvterdi satýdan túsken qarajatty shoǵyrlandyrý maqsatynda arnaýly memlekettik qor ashylady. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«Barshańyzǵa málim, 2023 jylǵy 12 shildede «Zańsyz ıemdelgen aktıvterdi memleketke qaıtarý týraly» Qazaqstan Respýblıkasynyń Zańy qabyldandy. Osy Zańdy iske asyrý maqsatynda QR Úkimeti Bas prokýratýra jáne múddeli memlekettik organdarmen birlese otyryp, qajetti sharalardy qabyldaýda. Atap aıtqanda, aǵymdaǵy jyldyń 5 qazanynda QR Premer-Mınıstri basqaratyn Zańsyz ıemdelgen aktıvterdi memleketke qaıtarý máseleleri jónindegi komıssııany qurý týraly QR Úkimetiniń qaýlysy qabyldandy», – dedi Úkimet basshysy jaýabynda.
Premer-Mınıstrdiń atap ótýinshe, komıssııanyń negizgi mindetteriniń biri – júıeli sharalardy júzege asyrý, zańsyz shyǵarylǵan kapıtaldy elge qaıtarýdyń ádisteri men tetikterin ázirleý. Onyń quramyna QR Úkimetiniń músheleri, quqyq qorǵaý organdarynyń basshylary, QR Parlamentiniń depýtattary men qoǵam qaıratkerleri kirdi. Bul rette barlyq sheshimder elimizdiń áleýmettik, ekonomıkalyq jáne saıası múddelerin eskere otyryp, alqaly túrde, ashyq jáne beıtarap qabyldanatyn bolady.
«Osy jyldyń 10 qazanynda komıssııanyń alǵashqy otyrysy ótkizildi. Jaqyn arada komıssııanyń qaraýyna Bas prokýratýranyń janyndaǵy Aktıvterdi qaıtarý jónindegi komıtetpen yntymaqtastyqqa daıyn tulǵalardyń aktıvterin óz erkimen qaıtarýy jónindegi usynystar, sondaı-aq tizilim arqyly ózge tulǵalarǵa qatysty májbúrli túrde qaıtarý jóninde usynystar shyǵarylatyn bolady.
Sonymen qatar qaıtarylǵan aktıvterdi basqarý, saqtalýyn qamtamasyz etý, ótkizý úshin Qarjy mınıstrliginiń janynda «Qaıtarylǵan aktıvterdi basqarý kompanııasy» JShS quryldy. Qaıtarylǵan aktıvterdi satýdan túsken qarajatty shoǵyrlandyrý maqsatynda arnaýly memlekettik qor ashylady. Onda memlekettiń áleýmettik jáne ekonomıkalyq jobalaryn odan ári qarjylandyrý úshin atalǵan aktıvterdi satýdan túsken qarajat esepke alynatyn bolady», – dedi Álıhan Smaıylov.
Úkimet basshysy munan bólek, 2022 jyldan bastap telekommýnıkatsııa, temirjol ınfraqurylymy, medıaaktıvter jáne basqa salalarda monopolııasyzdandyrý máselesi boıynsha usynymdardy tujyrymdaýmen aınalysatyn QR Úkimeti janyndaǵy Ekonomıkany monopolııasyzdandyrý jónindegi komıssııa jumys atqaryp jatqanyn atap ótedi.
«Búgingi kúnge osy komıssııanyń 40-tan astam otyrysy ótkizilip, nátıjesi boıynsha aktsıonerlik qoǵamdar men jaýapkershiligi shekteýli seriktesterdegi aktsııalar paketteri men qatysý úlesterin, ǵımarattardy, temirjol ınfraqurylymynyń obektileri men qurylys jaılardy, avtomobılderdi, aqshalaı qarajatty jáne ózge de múlikti memlekettik menshikke qaıtarý jóninde sheshimder qabyldandy», – dedi Premer-Mınıstr.
