Qaıtarylǵan aktıvter: Jambyl oblysynda Jańaótkel aýyly taza aýyz sýmen qamtamasyz etildi
TARAZ. KAZINFORM – Memleket basshysynyń tapsyrmasyna sáıkes, Jambyl oblysynda qaıtarylǵan aktıvter esebinen 19 aýyz sýmen qamtamasyz etý jáne densaýlyq saqtaý nysanynyń qurylysy qarjylandyryldy. Bul týraly oblystyq prokýratýra málim etti.
Máselen, 2025 jylǵy 30 maýsymda Jambyl oblysynyń prokýrory Nurǵalym Ábdirov Jambyl aýdany Jańaótkel aýylynda sýmen jabdyqtaý júıesiniń ashylý saltanatyna qatysty.
— Bul bastama memleketke qaıtarylǵan qarajattyń qoǵamnyń ıgiligine qalaı yqpal etetinin jáne negizgi áleýmettik ınfraqurylymdy damytýǵa jaǵdaı jasaıtynyn aıqyn kórsetedi, — dedi Nurǵalym Ábdirov.
Bul obektiniń ashylýyna deıin aýylda sýmen jabdyqtaý júıesi bolmaǵan jáne aýyl turǵyndary taza aýyz sýmen qamtamasyz etilmegen.
Endi jańa sýmen jabdyqtaý júıesi 260-tan astam aýyl turǵynyn taza aýyz sýmen qamtamasyz etýge múmkindik beredi.
Eske sala keteıik, buǵan deıin Jambyl oblysynda qaıtarylǵan aktıvter esebinen aýyldyq dárigerlik ambýlatorııa ashylǵanyn jazǵan edik.