Qaıtarylǵan aktıvter óńirlik áýejaılardy jańǵyrtýǵa baǵyttaldy
ASTANA. KAZINFORM — Memleket basshysynyń tapsyrmasy boıynsha prokýratýra organdary memleket menshigine 1 trıllıon teńgeden astam qarajatty qaıtardy.
Bul qarajat mektepter, aýrýhanalar, sporttyq jáne basqa da áleýmettik mańyzy bar nysandardyń qurylysyna baǵyttalyp jatyr.
Kólik salasynda 40 mıllıard teńgeden astam somaǵa 6 iri joba iske asyrylyp jatyr. Olardyń úsheýi aıaqtaldy.
Osyndaı jobalardyń biri — Pavlodar áýejaıyn qaıta jańartý. Áýejaıdyń jaǵdaıy uzaq ýaqyt boıy óńirdiń áýe qatynasyn shektep kelgen.
— Arnaýly memlekettik qor qarajaty esebinen ushý-qoný jolaǵyn qaıta jańartý aıaqtaldy. Endi áýejaıdyń ótkizý qabileti saǵatyna 200-den 300 jolaýshyǵa deıin artty, — delingen habarlamada.
Oń ózgerister Arqalyqta da boldy.
— 30 jyldan astam ýaqyt boıy qala men mańaıdaǵy aýdandardyń turǵyndary turaqty áýe qatynasyna qol jetkize almaǵan. Bıyl 22 tamyzda qaıtarylǵan aktıvter esebinen jańa termınal qurylysy men áýejaıdyń ushý-qoný jolaǵyn qaıta jańartý jumystary aıaqtaldy, — delingen Bas kólik prokýratýrasy habarlamasynda.
Budan bólek, aǵymdaǵy jylǵy 1 maýsymda jyl saıyn myńdaǵan turǵyndar men týrıster paıdalanatyn Balqash áýejaıy paıdalanýǵa berildi.
Áýejaılardy jańartý — bul tek jańa ǵımarattar men ushý jolaqtary ǵana emes. Eń aldymen, ushý qaýipsizdigi, ynǵaıly áýe qatynasy jáne óńirlerdi damytýdyń jańa múmkindikteri.
Osylaısha, qaıtarylǵan aktıvter naqty qoldanys taýyp, azamattardyń ıgiligine jumys istep jatyr.
Aıta ketelik qaıtarylǵan aktıvter esebinen óńirlerdegi 500 ınfraqurylymdyq jobaǵa 610 mlrd-tan astam teńge bólingen edi.
