Qaıtarylǵan aktıvter qoryna qansha qarajat tústi

ASTANA. KAZINFORM – Qarjy mınıstri Mádı Takıev Úkimet otyrysynan keıin ótken baspasóz máslıhatynda qaıtarylǵan aktıvterge arnalǵan arnaıy shotqa qansha qarajat túskenin aıtty.

«Bizdiń Qarjy mınıstrliginde arnaıy shot bar. Búgingi tańda osy shotqa 176,9 mlrd teńge jınaldy. Ol aqsha eń kerek ınfraqurylymdyq sharalarǵa jiberiledi. Onyń tizimin shyǵaryp jatyrmyz. Mysaly, óńirlerde aýyzsý problemasy óte kóp, soǵan jiberemiz. Sondaı-aq, energııa tapshy óńirler bolsa, joba jasap qarjy baǵyttaımyz. Osynyń bárin Úkimette aqyldasqannan keıin ashyq kórsetemiz», - dedi mınıstr.

Onyń aıtýynsha, múlik túrinde qaıtarylǵan aktıvter bólek jınalyp jatyr.

«Múlik bul qorǵa túspeıdi. Oǵan bólek kompanııamyz bar. Olar ony paıdalanady nemese satady. Onyń tolyq tizimin qosymsha berýge bolady. Dál qazir qansha teńgeniń múligi qabyldanǵanyn aıta almaımyn», - dedi Mádı Takıev.

Osyǵan deıin Mádı Tákıev ekonomıka óskenimen, jalaqy nege óspeı jatqany týraly saýalǵa bergen jaýabyn jarııaladyq.