Qaıtarylǵan aktıvter Qyzylordadaǵy aýyldyń aýyz sý máselesin sheshti
ASTANA. KAZINFORM — Aral aýdanynda qaıtarylǵan aktıvter esebinen salynǵan sý júıesi iske qosyldy, dep habarlaıdy Qyzylorda oblysy prokýratýrasynyń baspasóz qyzmeti.
Qyzylorda oblysynyń Aral aýdanyndaǵy Abaı aýylynda jańa aýyz sý júıesiniń saltanatty túrde iske qosylý rásimi ótti. Áleýmettik mańyzy bar nysan prokýratýra organdarynyń bastamasymen memleketke qaıtarylǵan aktıvter esebinen salyndy.
Nysannyń ashylý saltanatyna Qyzylorda oblysynyń ákimi Murat Ergeshbaev, aýdan ákimi Amanjol Ońǵarbaev, aýdan prokýrory Daryn Ábish jáne qoǵam ókilderi qatysty.
— Jobanyń júzege asyrylýy 2000-nan astam aýyl turǵynynyń sapaly aýyz sýǵa qol jetkizýine múmkindik berdi. Buǵan deıin aýyl turǵyndary aýyz sý máselesinde birqatar qıyndyqqa tap bolyp kelgen. Jańa sý júıesiniń iske qosylýy halyqtyń turmys sapasyn jaqsartyp, áleýmettik ınfraqurylymdy damytýǵa mańyzdy serpin berdi, — delingen habarlamada.
Aýyz sý nysanynyń paıdalanýǵa berilýi memleketke qaıtarylǵan aktıvterdiń halyq ıgiligine tıimdi jumsalyp jatqanyn jáne áleýmettik ádildikti qamtamasyz etýge baǵyttalǵan memlekettik saıasattyń naqty nátıjesin kórsetedi. Óńirdegi áleýmettik mańyzy bar nysandardyń qurylysy men paıdalanýǵa berilýi prokýratýra organdarynyń turaqty baqylaýynda.
Osyǵan deıin ShQO-da shekara shebindegi aýyl halqy aýyz sýdy bastaýdan tasyp ishetindikterine shaǵymdanǵanyn jazǵanbyz.
