Qaıtarylǵan aktıvter qarjysyna Arqalyq ýnıversıteti tolyq jańartyldy
ASTANA. KAZINFORM — Arqalyq qalasynda «Y. Altynsarın atyndaǵy Arqalyq pedagogıkalyq ýnıversıtetiniń ǵımaratyn rekonstrýktsııalaý» áleýmettik jobasy tolyq aıaqtaldy. Jobanyń jalpy quny — 1,9 mlrd teńge.
QR Bas prokýratýrasy baspasóz qyzmetiniń habarlaýynsha, joba organnyń zańsyz shyǵarylǵan aktıvterdi qaıtarý jónindegi júrgizip jatqan jumysy aıasynda Arnaıy memlekettik qordyń qarajaty esebinen iske asyryldy.
— Rekonstrýktsııa nátıjesinde shamamen 2,5 myń stýdenttiń bilim alýyna, ýnıversıtettiń professor-oqytýshylar quramynyń tıimdi eńbek etýine qolaıly ári zamanaýı jaǵdaı jasaldy. Sonymen qatar bul joba óńirdiń áleýmettik-ekonomıkalyq damýyna serpin berip, bilikti mamandar daıarlaý isin odan ári jetildirýge múmkindik beredi, — delingen habarlamada.
Vedomstvonyń málimetinshe, bıyl Qostanaı oblysynda memleketke qaıtarylǵan aktıvter esebinen qalyptastyrylǵan Arnaýly memlekettik qordyń qarajaty arqyly 6 áleýmettik nysannyń qurylysy men rekonstrýktsııasy josparlanǵan.
Olardyń qatarynda Arqalyqtaǵy áýejaı, aýrýhana, perzenthana jáne stýdentter jataqhanasy, Jitiqara qalasyndaǵy emhana, sondaı-aq Denısov aýdanynyń Pereleskı aýylyndaǵy dárigerlik ambýlatorııa bar.
Eske salaıyq, buǵan deıin Balqashta memleketke qaıtarylǵan aktıvter esebinen áýejaı rekonstrýktsııasy aıaqtalǵanyn habarlaǵan edik.
