Qaıtarylǵan aktıvter esebinen dárigerlik ambýlatorııalardyń qurylysy bastaldy
ASTANA. KAZINFORM – Memleket basshysynyń tapsyrmalaryna sáıkes, elimizde halyqtyń turmys sapasyn jaqsartýǵa jáne elge qaıtarylǵan zańsyz ıemdenilgen aktıvter esebinen áleýmettik ınfraqurylymdy damytýǵa baǵyttalǵan jobalardy júzege asyrý jalǵasyp jatyr. Bul týraly Úkimettiń baspasóz qyzmeti málimdedi.
Úkimet Jambyl oblysynyń Qordaı jáne Talas aýdandarynda eki dárigerlik ambýlatorııanyń qurylys jumystaryn aıaqtaýǵa Arnaýly memlekettik qordan 319,5 mln teńge bólý týraly sheshim qabyldady. Onda táýligine 45 kelýshige qyzmet kórsetiledi.
Nysandar «Aýylda densaýlyq saqtaýdy jańǵyrtý» baǵdarlamasy aıasynda salynýda. Baǵdarlama boıynsha óńirde 30 nysan qurylysy josparlanǵan, onyń 28-i paıdalanýǵa berildi. Qalǵan ekeýi bıyl tapsyrylady.
Ulttyq joba sheńberinde Qazaqstanda 655 jańa mekeme – medıtsınalyq jáne feldsherlik-akýsherlik pýnktter, dárigerlik ambýlatorııalar qurylysy josparlanyp otyr.
Qazir 468 nysanda jumys aıaqtaldy. Alǵashqy medıtsınalyq-sanıtarııalyq kómek kórsetý mekemelerin salýǵa jáne aýrýhanalardy rekonstrýktsııalaýǵa qarajat respýblıkalyq bıýdjetten bólinedi. Sonymen qatar qarjylandyrý Arnaýly memlekettik qor esebinen júzege asyrylady.
Aıta keteıik, memlekettik qordan ShQO-da aýylda dárigerlik ambýlatorııa salýǵa qarajat bólindi.