Qaıtarylǵan aktıvter qarajaty esebinen 400-den astam áleýmettik nysan salynyp jatyr

ASTANA. KAZINFORM — Qazirgi tańda 406 jobany qarjylandyrý maquldandy. Bul týraly Úkimettiń baspasóz qyzmeti habarlady. 

Elimizde zańsyz ıemdenilgen aktıvterdi memleket menshigine qaıtarý jumystary jalǵasyp jatyr. Memleket basshysy Qasym-Jomart Toqaevtyń tapsyrmasy boıynsha bul qarajat búkil el boıynsha júzdegen áleýmettik nysan qurylysy men jańǵyrtý jumystaryna jumsalyp jatyr.

Basty nazar áleýmettik mańyzdy ınfraqurylymǵa aýdarylady

Qaıtarylatyn qarajat Qarjy mınıstrliginiń janynan qurylǵan Arnaýly memlekettik qorǵa túsedi.

— Qazirgi tańda 406 jobany qarjylandyrý maquldandy. Onyń ishinde 9 bilim berý nysany, sport salasyndaǵy 3 nysandy, densaýlyq saqtaý salasyndaǵy 162 jobany, sýmen jabdyqtaý salasyndaǵy 159 jobany qosa alǵanda, 333 joba iske asyrylyp jatyr, — delingen habarlamada.

Barlyq joba Memleket basshysynyń áleýmettik mańyzy bar ınfraqurylymdy damytý jónindegi tapsyrmasy aıasynda júzege asyrylýda. Bilim berý nysandary sapaly bilimniń qoljetimdiligin arttyrýǵa yqpal etedi. Sport nysandary buqaralyq sportty damytýǵa jáne salaýatty ómir saltyn qalyptastyrýǵa baǵyttalǵan.

Shalǵaıdaǵy eldi mekenderde medıtsınalyq kómek kórsetý úshin «Aýylda densaýlyq saqtaýdy jańǵyrtý» baǵdarlamasy aıasynda medıtsınalyq mekemeler qurylady. Sý qubyry jelileriniń qurylysy 2025 jylǵa deıin elimizdiń barlyq qalasy men aýylyn 100% taza aýyz sýmen qamtamasyz etýdiń strategııalyq maqsatyna sáıkes keledi, bul — halyqtyń turmys sapasyn jaqsartý jolyndaǵy mańyzdy qadam. 

Astanada eski stadıonnyń ornyna Q.Muńaıtpasov atyndaǵy jańa stadıon salynyp jatyr. Jabyq sport ǵımaraty múgedektigi bar azamattarǵa arnalǵan oryndardy qosqanda, 3598 orynǵa eseptelgen. Qurylys UEFA halyqaralyq standarttaryna sáıkes júrgizilip jatyr.

Almatyda qaıtarylǵan qarajat esebinen sýmen jabdyqtaý júıesin salý boıynsha 9 joba júzege asyrylyp otyr.

Shymkent qalasyndaǵy «Saıram kómekshi mektep-ınternat-kolledji» kesheniniń tárbıelenýshileri úshin qaıtarylǵan qarajatqa 300 oryndyq jataqhana salynady.

Shyǵys Qazaqstan oblysynda qaıtarylǵan aktıvterge aýqymdy joba júzege asyrylyp jatyr. Medıtsınalyq mekemede 2 ǵımarat: 148 oryndyq statsıonar jáne 24 tósek-oryndyq klınıkanyń patsıentterine arnalǵan qonaq úı josparlanǵan.

Bas ǵımaratta zamanaýı medıtsınalyq jabdyqtarmen zerthanalar, radıatsııalyq dıagnostıka, kardıologııa, kardıohırýrgııa, gematologııa, súıek kemigin transplantatsııalaý jáne kúrdeli somatıka bólimsheleri jabdyqtalady. Jańa Ortalyq naýqastarǵa emdeýdiń jáne ońaltýdyń ozyq ádisterine qol jetkizýge múmkindik beredi.

Sonymen qatar qaıtarylǵan aktıvter esebinen óńirde taǵy 8 joba iske asyrylýda, onyń 2-eýi – densaýlyq saqtaý jáne 6-aýy – sýmen jabdyqtaý salasynda.

Soltústik Qazaqstan oblysynda búginde óńirdi sýmen jabdyqtaýdy jaqsartýǵa baǵyttalǵan jobalar júzege asyrylyp jatyr. Arnaýly memleket qor qarajaty esebinen Sokolov, Býlaev jáne Presnovskıı toptyq sý qubyrlaryn qaıta jańartý, sondaı-aq Kókshetaý toptyq sý qubyryna qosylǵan Aıyrtaý aýdany men Shal aqyn aýyldyq eldi mekenderine jańa sý qubyrlary men burmalar salý júrip jatyr.

Qaraǵandy oblysynda 7 aýdanda 51 densaýlyq saqtaý obektisin – dárigerlik ambýlatorııalardy, sondaı-aq feldsherlik-akýsherlik jáne medıtsınalyq pýnktterdi salý josparlanyp otyr.

Aqmola oblysynda densaýlyq saqtaý, sýmen jabdyqtaý jáne sport salasynda 38 joba júzege asyrylýda. Qaıtarylǵan aktıvter esebinen eki medıtsınalyq nysan ashyldy. Arshaly aýdanynyń Arnasaı aýylynda 2 myńnan astam adamǵa qyzmet kórsetetin dárigerlik ambýlatorııa paıdalanýǵa berildi, al Bulandy aýdanynyń Altyndy aýylynda feldsherlik-akýsherlik pýnkt salyndy. 1 myńnan astam azamaty bar úsh eldi mekenniń turǵyndary ýaqtyly medıtsınalyq kómekke sene alady.

Aqtóbe oblysynda qaıtarylǵan aktıvter esebinen jańa bilim berý jáne densaýlyq saqtaý obektileri salynady. Óńirde 12 áleýmettik mańyzy bar joba júzege asyrylýda. Solardyń biri – Aqtóbe qalasyndaǵy erekshe balalarǵa arnalǵan arnaıy balabaqsha.

Qordan Abaı oblysynda 24 áleýmettik mańyzy bar nysandy júzege asyrýǵa qarjy bólindi. Óńirde jańa sýmen jabdyqtaý jelileri, sondaı-aq medıtsınalyq mekemeler salynady.

Atyraý oblysynda densaýlyq saqtaý, bilim berý jáne sýmen jabdyqtaý salalarynda bir nysannan salynady.

Jetisý oblysynda bilim berý, densaýlyq saqtaý jáne sýmen jabdyqtaý salalarynda 22 jobany júzege asyrý josparlanǵan.

Almaty oblysynda jańa sport nysandary, sýmen jabdyqtaý jelileri men medıtsınalyq mekemeler salynady. Úkimettiń sheshimimen bólingen qarajat Kegen aýdany Jalaǵash aýylynda sport keshenin salýǵa baǵyttaldy.

Jambyl oblysynda qaıtarylǵan qarajatqa 19 joba salynady. 4 joba densaýlyq saqtaý júıesi jelisi boıynsha, taǵy 15 joba sýmen jabdyqtaý jelilerin salý boıynsha.

Batys Qazaqstan oblysynda jyl sońyna deıin 25 jobany tapsyrý josparlanýda. Bul medıtsınalyq jáne feldsherlik-akýsherlik pýnktter, dárigerlik ambýlatorııalar, sondaı-aq sý qubyrlaryn salý boıynsha jobalar.

Mańǵystaý oblysynda qaıtarylǵan aktıvterge 1 densaýlyq saqtaý nysany salynady.

Qostanaı oblysynda sýmen jabdyqtaý jelileri túbegeıli jańartylady. Sondaı-aq óńirde bir densaýlyq saqtaý jáne bilim berý nysandaryn salý josparlanyp otyr.

Túrkistan oblysynda qaıtarylǵan aktıvterge bir bilim berý obektisin salý, sondaı-aq óńir turǵyndaryn sýmen qamtamasyz etý boıynsha 35 jobany iske asyrý josparlanǵan.

Pavlodar jáne Qyzylorda oblystarynda sýmen jabdyqtaý jelileri men medıtsınalyq mekemelerdiń qurylysy boıynsha jobalardy iske asyrý josparlanyp otyr.

Ulytaý oblysynda jańa bilim berý, densaýlyq saqtaý jáne sýmen jabdyqtaý nysandary salynady.

Aıta ketelik aktıvterdi qaıtarý zańy kúshine engennen beri qansha aqsha syrtqa shyǵarylǵany týraly jazǵan edik.