Qaıtarylǵan aktıvter halyq ıgiligine qyzmet etip jatyr: BQO-da qurylysqa 17,7 mlrd teńge bólindi

Bul eseptegi jaı ǵana san emes. Bul – aýyl turǵyndarynyń kúndelikti turmysyn jaqsartyp jatqan aýrýhanalar, feldsherlik-akýsherlik pýnktter (FAP) jáne aýyz sý qubyrlary.

Búgingi tańda osy qarajat esebinen jalpy quny 4,9 mlrd teńge bolatyn 23 nysan paıdalanýǵa berildi, taǵy 4 joba júzege asyrylý kezeńinde.

Paıdalanýǵa berilgen nysandardyń biri – Syrym aýdanynyń Shaǵyrloı aýylyndaǵy jańa feldsherlik-akýsherlik pýnkt. Aýyl turǵyndary jarty ǵasyrǵa jýyq ýaqyt boıy 1979 jyly salynǵan, qazirgi zaman talaptaryna múlde sáıkes kelmeıtin ǵımaratta medıtsınalyq kómek alyp kelgen.

Oblystyq prokýratýra málimetinshe, buǵan deıin turǵyndar medıtsınalyq kómek alý úshin aýa raıyna, táýlik ýaqytyna jáne densaýlyq jaǵdaıyna qaramastan aýdan ortalyǵyna deıin 22 shaqyrym jol júrýge májbúr bolatyn.

Endi sapaly medıtsınalyq qyzmet aýyl turǵyndary úshin qoljetimdi boldy. Qazir jańa medıtsınalyq pýnkttiń qyzmetin aýyldyń 623-ten astam turǵyny paıdalanyp otyr.

Jobanyń jalpy quny 337,8 mln teńge. Onyń ishinde 136 mln teńge memleketke qaıtarylǵan aktıvter esebinen qalyptastyrylǵan Arnaýly memlekettik qordan bólindi. Buryn zańsyz aınalymnan shyǵarylǵan bul qarajat búginde halyqtyń ıgiligine qyzmet etip otyr.

Jergilikti turǵyndardyń aıtýynsha, jańa medıtsınalyq pýnkttiń ashylýy – kópten kútken mańyzdy oqıǵa. Ol aýyldaǵy medıtsınalyq kómektiń qoljetimdiligine qatysty kópjyldyq máseleniń sheshilýine múmkindik berdi.

Bólingen qarajattyń maqsatty jumsalýy men qurylys jumystarynyń barysy prokýratýra organdarynyń turaqty baqylaýynda. Memleketke qaıtarylǵan aktıvter esebinen qarjylandyrylatyn jobalardyń árbir kezeńi jiti qadaǵalanady.

Shaǵyrloı aýylynyń mysaly memleketke qaıtarylǵan aktıvterdiń myńdaǵan azamattyń ómir súrý sapasyn jaqsartýǵa naqty úles qosyp jatqanyn aıqyn kórsetedi.

Aıta keteıik, ShQO-da memleketke qaıtarylǵan aktıvter esebinen MRT ortalyǵy ashyldy.