Qaıtarylǵan aktıvter esebinen SQO-da balabaqsha salynyp jatyr

PETROPAVL. KAZINFORM — 4 maýsymda Soltústik Qazaqstan oblysy prokýrorynyń birinshi orynbasary Abý-Alı Sattar ákimdik ókilderimen birlesip Petropavl qalasynda balabaqsha qurylysyn tekserdi. 

Soltústik Qazaqstan oblysynyń prokýratýrasynyń málimetinshe, obekt prokýratýra organdary qaıtarǵan aktıvter esebinen salynady. Jobanyń jalpy somasy 1,9 mlrd teńge.

— Balabaqsha 280 orynǵa eseptelgen, bul kezektilikti qysqartady jáne balalardy oqytý men damytý úshin zamanaýı jaǵdaılar jasaıdy. Búgingi tańda jumys 40 paıyzǵa aıaqtaldy. Nysandy tapsyrý bıyl jeltoqsan aıyna josparlanǵan, — delingen habarlamada.

Soltústik Qazaqstan oblysy boıynsha barlyǵy qaıtarylǵan aktıvter esebinen 33 joba iske asyrylyp jatyr.

Áleýmettik nysandardyń qurylysy — bul óńirdiń damýyna jáne bolashaq urpaqtyń ál-aýqatyna qosqan úlesi. 

Aıta ketelik qaıtarylǵan aktıvter qarajaty esebinen 400-den astam áleýmettik nysan salynyp jatqany týraly jazǵan edik.