Qaıtarylǵan aktıvter esebinen aýyldarda qandaı áleýmettik jobalar júzege asýda

ASTANA. KAZINFORM — Qaıtarylǵan aktıvterdi ádil ári tıimdi paıdalaný jónindegi memlekettik saıasat aıasynda aýyldyq eldi mekenderde áleýmettik mańyzy bar jobalar júzege asyryla bastady.

Atap aıtqanda, memleketke qaıtarylǵan aktıvterden qalyptastyrylǵan arnaýly memlekettik qor qarajaty esebinen Qaraǵandy oblysynyń Shet aýdanyna qarasty Eńbekshil jáne Jylandy aýyldarynda dárigerlik ambýlatorııalar salynýda. Bul jobalar shalǵaıdaǵy aýyl turǵyndarynyń alǵashqy medıtsınalyq-sanıtarlyq kómekke qoljetimdiligin arttyrýǵa, densaýlyq saqtaý sapasyn jaqsartýǵa jáne ómir súrý deńgeıin kóterýge baǵyttalǵan.

Sondaı-aq Kóktenkól aýdanynda turǵyndardy taza aýyzsýmen qamtý maqsatynda sý qubyry jelileriniń qurylysy bastaldy. Bul bastama óńirdegi ózekti áleýmettik másele — ortalyqtandyrylǵan sýmen jabdyqtaý máselesin sheshýge múmkindik beredi.

- Bas prokýratýra zańsyz jolmen alynǵan aktıvterdi memleketke qaıtarý jáne olardy qoǵam ıgiligi úshin tıimdi paıdalaný isine júıeli túrde den qoıyp otyr. Qaıtarylǵan qarajat áleýmettik ınfraqurylymdy, densaýlyq saqtaý men bilim berý salalaryn damytýǵa, azamattardyń ómir súrý jaǵdaılaryn jaqsartýǵa baǵyttalady, - dep jazdy baqylaýshy organnan.

Vedomstvo aldaǵy ýaqytta da halyq múddesin kózdeıtin bastamalardy jalǵastyra beretinin jáne bul jumystar memlekettik ınstıtýttarǵa degen senimdi nyǵaıtýǵa yqpal etetinin atap ótti.

Aıta keteıik, SQO-da qaıtarylǵan aktıvter esebinen 30 aýylǵa sý qubyry tartylyp jatyr.