Qaıtarylǵan aktıvter: Cartier, Breguet, Tiffany, Ulysse Nardin Classic qol saǵattary aýktsıonǵa shyǵarylady
ASTANA. KAZINFORM - Qoǵamda elimizden zańsyz jylystatylǵan aktıvterge baılanysty týyndap otyrǵan suraq az emes. Keıingi ýaqytta bul baǵytta memleket tarapynan aýqymdy jumys júrgizilip jatqany belgili. Alaıda kópshilik qaıtarylǵan aktıvterdiń kimderdiń basqarýyna berilgenin, qaıda saqtalatynyn, sondaı-aq olardyń ótkizilýi jóninde dáıekti aqparatty bilgisi keledi.
Osyǵan oraı Qaıtarylǵan aktıvterdi basqarý kompanııasyna habarlasyp, qolǵa alynǵan jumystary týraly surap bilgen edik.
Atalǵan kompanııanyń qyzmeti «Zańsyz ıemdenilgen aktıvterdi memleketke qaıtarý týraly» QR Zańy aıasynda belgilengen. Aktıvterdiń tıimdi basqarylýy men saqtaý týrasynda, sondaı-aq olardyń qunyn arttyrýǵa baılanysty málimet resmı saıttarynda ornalastyrylǵan.
Kompanııanyń baspasóz qyzmetiniń aqparatyna súıensek, qaıtarylǵan aktıvterdiń arasynda suranysy joǵary zergerlik buıymdar men álemge áıgili brendterdiń qol saǵattary bar. Mysaly, Cartier, Breguet jáne Tiffany syndy tanymal markalardyń buıymdary satylymǵa shyǵarylǵan. Al 214,4 mln teńge turatyn shekteýli shyǵarylymdaǵy Ulysse Nardin Classic 789-80 qol saǵaty atalǵan buıymdardyń ishindegi eń qundy zattardyń biri sanalady. Sonymen qatar eki syrǵa, tizbektelgen alqa jáne eki saqınadan turatyn gaýhar jıyntyǵy 85 mln teńgege baǵalanyp otyr.
«Aktıvterdi satý ashyq ári tıisti zańǵa sáıkes ádil túrde júrgiziledi», - deıdi kompanııanyń ókilderi.
Saýda-sattyq aýktsıon arqyly, onyń ishinde elektrondy formatta ótkiziledi. Ár aktıv táýelsiz baǵalaýshynyń belgilegen baǵasyna sáıkes satylady. Zergerlik buıymdar men saǵattardyń baǵasy dúkendegi baǵadan tómen bolýy múmkin. Aktıvterdiń ótimdiligi joǵary nemese naryq baǵasymen satýǵa qolaıly bolsa, onda satýǵa qoıylady.
«Eger de aktıvter bir saýda tsıklynan ótpegen jaǵdaıda olar e-Qazyna portaly arqyly qaıta satylymǵa shyǵarylady. Bul ádis aktıvterdi satýdyń ashyqtyǵyn qamtamasyz etip, naryqtaǵy suranysqa sáıkes baǵany qalyptastyrady», - dep naqtylady QABK -nyń mamandary.
Al taıaý ýaqytta aýktsıon arqyly birqatar aktıv satylymǵa shyǵarylmaq. Atap aıtqanda, 9 qazanda JShS-ne qatysý úlesteri bar eki nysannyń saýda-sattyǵy ótkiziledi: JShS-degi úlesi/qatysýy, qyzmet túri - sýdy jınaý, óńdeý jáne taratý jáne JShS-degi úlesi/qatysýy, qyzmet túri - derbes qazandyqtarmen jylý energııasyn óndirý.
11 qazanda kelesi nysandardyń saýda-sattyǵy ótkiziledi:
- Monetalar, jalpy quny 1 564 810 teńge - quny 150 myńnan bastalyp, 690 myń teńgege deıin jetetin kollektsııalyq monetalar;
- Saǵattar, jalpy quny - 314 742 586 teńge;
- Áshekeı buıymdar, jalpy quny - 97 963 968 teńge.
Jalpy aktıvtiń qorytyndy baǵasy – 414 271 364 teńge. Tutastaı 19 lot.
Aýktsıonǵa qatysý aktıvterge ıelik etýmen birge qoǵamnyń ıgiligine arnalǵan áleýmettik jobalardy iske asyrýǵa jol ashady. Máselen, satylymnan túsken barlyq qarajat Arnaýly memlekettik qorǵa aýdarylyp, elimizdegi mańyzdy áleýmettik-ekonomıkalyq jobalardy qarjylandyrýǵa jumsalatynyn aıta ketken oryndy.
Tutastaı alǵanda, 2024 jyldyń 1 qazanyndaǵy jaǵdaı boıynsha basqarýshy kompanııa 5,7 mlrd teńge somaǵa aktıvterdi satqan. Olardyń ishinde 4,4 mlrd teńge sheteldik aktıvterdi satýdan túsken.
