Qaıtarylǵan aktıvter bıyl qansha tabys ákeldi
ALMATY. KAZINFORM — 2025 jyldyń basynan beri aýktsıondar arqyly 32 qaıtarylǵan aktıv satylǵan.
«Qaıtarylǵan aktıvterdi basqarý kompanııasynyń» málimetine sáıkes, bıyl zergerlik buıymdar, elıtalyq qolsaǵattar, kollektsııalyq monetalar jáne jyljymaıtyn múlik nysany esebinen 198 505 235 teńge qarjy túsken.
Aýktsıonda eń baǵaly aktıv Astana qalasynda ornalasqan úı-jaı bolǵan. Ol 96 mln teńgege satyldy. Odan bólek:
- Patek Philippe World Time Chronograph Green Mecca Edition qolsaǵaty — 36 270 976 teńge;
- Cartier Ballon Bleu Tourbillon qolsaǵaty — 17 710 344 teńge;
- Chopard Imperiale qolsaǵaty — 4 819 512 teńge;
- Breguet 882U № 3271 saǵaty — 8 822 779 teńge;
- Ulysse Nardin Executive Skeleton Tourbillon saǵaty — 5 959 911 teńge;
- Chopard alqasy — 2 362 688 teńge;
- Cartier LOVE bilezik pen júzik — 2 619 282 teńge;
- Blancpain Villeret Ultraplate qolsaǵaty — 2 975 401 teńge;
- Basqa zergerlik buıymdar, syrǵalar, júzikter, bilezikter men kollektsııalyq monetalar — 19 mln teńge.
— Barlyq aýktsıondar E-Qazyna veb-platformasynda elektrondy formatta ótkizildi jáne ashyqtyq pen jarııalylyq prıntsıpteri qatań saqtaldy, — delingen kompanııa jaýabynda.
Qazirgi ýaqytta «Qaıtarylǵan aktıvterdi basqarý kompanııasy» basqarýynda zergerlik buıymdardy qospaǵanda jalpy quny 48,6 mlrd teńge bolatyn 37 aktıv bar. Onyń ishine quny 12,5 mlrd teńge bolatyn Almaty qalasyndaǵy 6 jer ýchaskesi kiredi.
— Jaqyn arada 164 dana zergerlik buıym jáne Almaty qalasyndaǵy «Kóktem-2» yqsham aýdany, 22 mekenjaıyndaǵy jyljymaıtyn múlik satýǵa qoıylady. Sondaı-aq aýktsıonǵa Almaty oblysyndaǵy 15 jer ýchaskesi shyǵaryldy. Aýktsıondar 2025 jylǵy 22 shilde men 31 shilde aralyǵynda ótip jatyr, — dep habarlady kompanııadan.
Aýktsıonnan túsken barlyq qarajat Arnaıy memlekettik qorǵa aýdarylady. Qazirge deıin qorǵa 25,4 mlrd teńge túsken. Onyń ishinde: 24,6 mlrd teńge — aktıvterdi satýdan, 800 mln teńge — jaldaý, dıvıdendter jáne senimgerlik basqarýdan túsken kirister.
Eske salaıyq, «Qaıtarylǵan aktıvterdi basqarý kompanııasy» 2023 jylǵy 21 qyrkúıekte qurylǵan. Tolyqtaı memleket menshigine tıesili kompanııa memleketke qaıtarylǵan aktıvterdi qabyldap, aktıvter satylǵanǵa deıin olardy jalǵa berý, senimgerlik basqarý, óz betimen basqarý arqyly úzdiksiz jumys isteýin qamtamasyz etedi.