Balqashtaǵy medıtsınalyq mekemelerdi jańǵyrtýǵa 7,5 mlrd teńge baǵyttaldy
ASTANA. KAZINFORM — Qaraǵandy oblysyndaǵy birqatar medıtsınalyq nysandy júzege asyrýǵa Arnaýly memlekettik qordan shamamen 7,5 mlrd teńge bólindi. Bul týraly Úkimettiń baspasóz qyzmeti málim etti.
Qaraǵandydaǵy jańa onkologııalyq ortalyqtyń operatsııalyq-reanımatsııalyq blogyn zamanaýı jabdyqtarmen jaraqtandyrýǵa 6,2 mlrd teńge bólindi. Oblystyq bıýdjetten qosymsha 1,74 mlrd teńge kóleminde birlesip qarjylandyrý kózdelgen. Qazirgi ýaqytta nysannyń daıyndyǵy 70%-ǵa jetti, ishki árleý jumystary júrgizilip jatyr.
— Balqash qalasynda qazirgi ýaqytta kúrdeli jóndeý júrgizilip jatqan kópbeıindi aýrýhana bazasynda aýdanaralyq medıtsınalyq hab qurylady. Bul maqsattarǵa 1 mlrd teńgeden astam qarjy bólindi, jalpy quny 1,27 mlrd teńgeni quraıdy. Joba aıasynda angıografııalyq operatsııalyq jáne qabyldaý-dıagnostıkalyq bólimshelerdi ornalastyrý úshin qosymsha korpýstyń qurylysy aıaqtalýda. Búgingi tańda nysan 96%-ǵa daıyn. Sondaı-aq qańqany salý, ınjenerlik jelilerdi tóseý jáne ishki árleý boıynsha negizgi jumystar aıaqtaldy. Nysandy osy jyldyń sońyna deıin tapsyrý josparlanǵan, — delingen habarlamada.
Sonymen qatar Balqashta balalardy ońaltý ortalyǵy qurylyp jatyr. Burynǵy sanatorıı ǵımaratyn qaıta jabdyqtaý úshin 272,1 mln teńge baǵyttaldy. Joba statsıonar jáne ambýlatorııalyq qabyldaýdy uıymdastyrýdy kózdeıdi. Reabılıtologtardy, nevropatologtardy, logopedterdi jáne EDSh nusqaýshylaryn qosa alǵanda, tar beıindi mamandardan turatyn kópsalaly komanda qurylady. Bul balalarǵa oblys ortalyǵyna barmaı-aq sapaly ońaltýǵa qol jetkizýdi qamtamasyz etedi. Jumystardy aıaqtaý 2026 jyldyń aqpan aıyna josparlanǵan.
Osy jobalardy júzege asyrý óńirdegi medıtsınalyq kómektiń sapasyn arttyrady. Osylaısha, angıografııalyq operatsııalyq bólimsheni iske qosý «altyn saǵat» qaǵıdasy negizinde jáne patsıentterdiń ómirin saqtaı otyryp, Balqash turǵyndaryna ınfarkt pen ınsýlt kezinde shuǵyl joǵary tehnologııalyq kómek kórsetýge múmkindik beredi. Ońaltý ortalyǵynyń ashylýy turǵylyqty jeri boıynsha erekshe qajettilikteri bar balalar úshin qalpyna keltirý emin úzdiksiz alýdy qamtamasyz etedi.
Aıta keteıik, qaıtarylǵan aktıvter esebinen 4 myńǵa jýyq qostanaılyq taza sýmen qamtylady.